Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 960 Hüküm no: 790 Orijinal metin no: [179b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Abacı Osman Çelebi’nin kızı Hanife’ye İbrahim Çelebi’nin vasi tayin edildiği Mahmiye-i İstanbul’da Baklalı mahallesinde sâkin iken bundan akdem vefât eden Abacı Osman Çelebi b. Mehmed’in sulbiye sagīre kızı Hanife’nin tesviye-i umûruna cânib-i şer‘-i enverden bir vasî nasb ü ta‘yîn olunmak lâzım ve mühim olmağın emânet ile ma‘rûf ve diyânet ile mevsûf ve vesâyet uhdesinden gelmeğe kemâ-yenbağī kādir idiği lede’ş-şer‘i’l-mutahhar zâhir ve mukarre[r] olan işbu bâ‘isü’l-kitâb İbrahim Çelebi b. el-Hâc Ali nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin vakt-i rüşd ü sedâdına varınca tesviye-i umûruna vasî nasb ü ta‘yîn buyurdukda ol dahi vesâyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a kayd-şüd. Fî gurreti Receb sene 1110 Şuhûdü’l-hâl: Mustafa Çelebi b. Mahmud, Abdullah Çelebi b. Mehmed, Ebubekir Çelebi b. Mehmed, el-Hâc Hasan b. Mahmud, Mustafa Çelebi b. Ahmed, Mustafa Çelebi b. Sefer, Abdullah Çelebi b. Sefer, Ali Çelebi b. Sefer ve gayruhum.