Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 63 Hüküm no: 21 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Rukıye Hatun’un oğlu Mehmed Sadık’a nafaka takdiri Mahmiye-i İstanbul’da Kapudan Sinan Paşa mahâllesinde sâkine iken bundan akdem vefât eden Rukıye Hatun bt. İbrahim Efendi’nin sadrî sagīr oğlu Mehmed Sadık b. Ali’nin min-kıbeli’l-üm ceddi ve tesviye-i umûruna bâ-hüccet-i şer‘iyye vasiyy-i muhtârı mezbûr İbrahim Efendi b. el-Hâc Hüseyin talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun nafaka ve kisvesi’çün vâlidesi müteveffât-ı mezbûreden müntakil mâlından olmak üzere yevmî altı akçe nafaka ve kisve-baha farz ve takdîr buyurup meblağ-ı mefrûz-ı mezbûr yevmî altı akçeyi sagīr-i mezbûrun nafaka ve kisve ve sâir levâzım-ı zarûriyesine harc u sarfa ve vakt-i hâcetde istidâneye ve lede’z-zafer mâlına rücû‘a vasiyy-i mezbûr İbrahim Efendi’ye izin vermeğin mâ-vaka‘a bi’t-taleb ketb olundu. Fî 21 min-Cumâdelûlâ sene 1143. Şuhûdü’l-hâl: Mehmed Efendi b. Mustafa, Ahmed Efendi b. Şücaeddin, Osman Ağa b. (°), Ali Odabaşı b. Yusuf, İbrahim Çelebi b. Hüseyin, Halil Efendi b. Mehmed Tahir, Ahmed Çelebi b. Hasan, Mehmed Beşe b. Mustafa ve gayruhum