Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 124 Hüküm no: 86 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Çavuş’un tek varisinin Mustafa olduğu Mahrûse-i Galata sâkinlerinden iken bundan akdem vefât eden Mehmed Çavuş Ağa b. Yusuf’un mukarrun-leh bi’n-neseb cihetinden vârisi olduğunu iddi‘â eden bâ‘isü’l-kitâb Mustafa b. Şa‘bân mahmiye-i İstanbul’da meclis-i hatîr-i lâzımü’t-tevkīrde müteveffâ-yı mezbûrun hîn-i fevtinde zâhirde vâris-i ma‘rûfu olmayıp terekesi cânib-i beytülmala âid olmak üzere mahrûse-i mezbûrede sâbıkā voyvoda? olmağla tereke-i müteveffâ-yı mezbûra bi’l-emâne vaz‘-ı yed ve kıbel-i şer‘den husûmet ve redd-i cevâba mezûn olan fahrü’l-akrân el-Hâc Ağa b. Mehmed b. Abdullah tarafından husûs-ı âti’l-beyanda vekîl olduğu Mehmed Ağa b. Mustafa ve Ali b. Mehmed şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan Ali Ağa b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çavuş Ağa b. Yusuf b. Osman hayâtında benim için li-ebeveyn kız karındaşım Hadîce’nin sadrî oğlu ve fevtimden sonra vârisimdir deyü huzûr-ı Müslimînde ikrâr ve işhâd edip ben dahi tasdîk etmekle hâlâ müteveffâ-yı mezbûrun verâseti mukarrun-leh bi’n-neseb cihetinden bana münhasıra ve terekesi bana isâbet edip tereke-i müteveffâ-yı mezbûra cihet-i mezbûreden benden gayrı vâris ve müstahakk-ı âhar olmamağla müvekkil-i mezbûrun tereke-i müteveffâ-yı mezbûrdan bi’l-emâne makbûzu olan meblağı, müvekkile-i mezbûrdan taleb eylediğimde bana teslîmden imtinâ‘ eder suâl olunsun dedikde gıbbe’s-suâl vekîl-i mezbûr cevâbında müvekkilinin tereke-i müteveffâ-yı mezbûra bi’l-emâne vaz‘-ı yedini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahrûse-i mezbûrede Nalçacı Hanı’nda sâkin Hüseyin b. Mahmud ve mahmiye-i mezbûrede Üskübî mahâllesinde sâkin Mehmed Çelebi b. İsmail li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Çavuş b. Yusuf b. Osman hayâtında işbu müdde‘î-i mezbûr Mustafa için li-ebeveyn karındaşım Hadîce’nin sadrî oğlu ve fevtimden sonra vârisimdir deyü huzûrumuzda ikrâr ve bizi işhâd ettikde müdde‘î-i mezbûr dahi tasdîk etmekle müteveffâ-yı mezbûr verâseti mukarrun-leh bi’n-neseb cihetinden işbu müdde‘î-i mezbûra münhasır ve terekesine müdde‘î-i mezbûrdan gayrı vâris ve âhar müstahak olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 7 min-Cumâdelâhire sene 1143. Şuhûdü’l-hâl: Abdülbaki Efendi b. Ahmed Efendi, es-Seyyid Mustafa b. Mehmed Efendi Balizâde, Ahmed Çelebi b. İsmail, Salih Çelebi b. Halil