Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 126 Hüküm no: 88 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi’nin para ve eşyasını emaneten elinde bulunduran Haseki Mehmed Ağa’nın bunları vereseye teslim ettiği Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Derviş Mehmed Efendi irsâl olunup ol dahi mahmiye-i İstanbul’da Yenibağçe kurbünde Keçeci Pîrî mahâllesinde Haseki Mehmed Ağa b. İsmail’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Yenibağçe kurbünde Mimarsinan mahâllesi ahâlîsinden olup İnebahtı kazâsında misâfiren sâkin iken bundan akdem vefât eden yeniçeri halîfelerinden Ahmed Efendi b. Abdülbaki’nin verâseti li-ebeveyn er karındaşı Mustafa Ağa ve li-ebeveyn kız karındaşı Âişe Hatun’a münhasır olup kable’l-kısmet mezbûr Mustafa Ağa dahi vefât edip verâseti zevce-i menkûha-i metrûkesi Fâtıma Hatun bt. Mehmed ile sulbiye sagīre kızı Rukıye’ye ve li-ebeveyn kız karındaşı mezbûre Âişe Hatun’a münhasıra ve tashîh-i meselesi bi-hükmi’l-münâsahati’ş-şer‘iyye on iki sehmden olup sihâm-ı mezbûrenin bir sehmi zevcesi mezbûre Fâtıma Hatun’a ve dört sehmi sagīre-i mezbûre Rukıye’ye ve yedi sehmi mezbûre Âişe Hatun’a isâbeti tahakkukundan sonra zevce-i mezbûre Fâtıma Hatun bt. Mehmed b. Ahmed’in vâlidesi ve tarafından husûs-ı âti’l-beyanda müseccel vekîli sagīre-i mezbûrenin tesviye-i umûruna kıbel-i şer‘den mansûbe vasiyyesi olup zâtı ta‘rîf-i şer‘î ile mu‘arrefe olan Afife Hatun bt. Abdullah vekâleten ve vesâyeten ve mezbûre Âişe Hatun bt. Abdülbaki b. Abdullah’ın zevci ve tarafından kezâlik husûs-ı âti’l-beyanda müseccel vekîli fahrü’l-akrân Hoca Hüseyin Efendi b. Mahmud vekâleten meclis-i ma‘kūd-ı mezkûrda işbu bâ‘isü’l-kitâb fahrü’l-eşbâh Haseki mezbûr Mehmed Ağa mahzarında her biri bi’l-vekâle ve bi’l-vesâye ikrâr ve takrîr-i kelâm edip müteveffâ-yı mezbûrân Ahmed Efendi ve Mustafa Efendi hîn-i fevtlerinde yanlarında mevcûd olup İnebahtı ve Ballıbadra kadıları ikrârları mûcebince ba‘de’l-ihrâci’l-masârıf sahhü’l-bâkī mezbûr Ahmed Efendi’nin on bir bin dört yüz on bir akçe ve mezbûr Mustafa Ağa’nın on bir bin beş yüz doksan akçe ki cem‘an nakid yirmi üç bin bir akçe ile mezbûr Ahmed Efendi’nin on dört bin dokuz yüz otuz sekiz akçe kıymetli aynî mevcûd ber-mûceb-i defter-i mezbûr eşyâsını mezbûr Mustafa Ağa’nın altı bin dokuz yüz kırk dokuz akçe kıymetli aynî mevcûd kezâlik eşyâsını mezbûr Haseki Mehmed Ağa bi’l-emâne kabz etmekle meblağ-ı mecmû‘-ı mezbûr yirmi üç bin bir akçeyi ve eşyâ-yı mezkûru bize def‘ u teslîm biz dahi mezbûr Mehmed Ağa yedinden tamâmen alıp kabz eyledik, ba‘de’l-yevm meblağ-ı mecmû‘-ı mezbûr yirmi üç bin bir akçe ile zikr olunan eşyâlardan mezbûr Mehmed Ağa yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan Ahmed Çelebi b. Mehmed ve Salih Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 23 min-şehri Rebî‘ülâhir sene 1143. Şuhûdü’l-hâl: Es-seyyid Musa Çelebi b. es-Seyyid Mehmed, es-Seyyid Ali Çelebi b. Hüseyin, es-Seyyid el-Hâc Ali b. es-Seyyid İbrahim, es-Seyyid Osman b. Mehmed, Osman b. Ali, Hasan Beşe b. Ali