Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 161 Hüküm no: 109 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin vefatıyla çocuklarına anneleri Ayşe Hatun’un vasi tayin edildiği Mahmiye-i İstanbul’da Haraççı Muhyiddin mahâllesinde sâkin iken bundan akdem vefât eden Hamal Hüseyin Beşe b. Süleyman’ın verâseti zevce-i menkûha-i metrûkesi Âişe Hatun bt. Abdullah ile sulbiye sagīre kızı Emine’ye ve sulbî kebîr oğlu Hasan’a ve vilâyet-i Anadolu’da Kengiri kazâsına tâbi‘ Pamukören nâm karyede sâkin âhar kebîr oğlu Süleyman ve kebîre kızı Raziye’ye münhasıra olduğu şer‘an zâhir oldukdan sonra sagīre-i mezbûre Emine’nin tesviye-i umûruna ve mezbûrân Süleyman ve Raziye’nin hisse-i ırsiyelerini ahz u kabz ve zabt ve hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet-i mezbûre uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīre-i mezbûretânın vâlidesi işbu bâ‘isü’l-kitâb mezbûre Âişe Hatun’u hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûrenin vakt-i rüşd ü sedâdına değin tesviye-i umûruna ve mezbûrân Süleyman ve Raziye’nin hisse-i ırsiyelerini ahz u kabz ve zabt u hıfza vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-Cumâdelâhir sene 1143. Şuhûdü’l-hâl: Ali Bey b. Receb, Ali Beşe b. Mehmed, Ahmed b. Mustafa, Mehmed Beşe b. Bali, Mustafa b. Hüseyin, Seyyid Abdullah b. Seyyid Ahmed