Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 331 Hüküm no: 263 Orijinal metin no: [59M/b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş’un vefatıyla varislerine kalan harap evin Mehmed Ağa’ya satıldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Mustafa Efendi b. Ebubekir irsâl olunup ol dahi mahmiye-i İstanbul’da Saraç İshak mahâllesinde sâkin iken bundan akdem vefât eden el-Hâc Ahmed Çavuş Ağa b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Zeyneb Hatun bt. Ebubekir ile sulbiye sagīre kızı Hadîce’ye ve li-ebeveyn er karındaşı Ali Çelebi’ye ve li-ebeveyn kız karındaşı olup vilâyet-i Anadolu’da Divriği kasabasında sâkine Hadîce Hatun’a münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûreye ve dört sehmi kızı sagīre-i mezbûreye ve iki sehmi karındaşı mezbûr Ali Çelebi’ye ve bir sehmi kız karındaşı mezbûre Hadîce Hatun’a isâbeti tahakkukundan sonra mezbûr Ali Çelebi ile zâtı ta‘rîf-i şer‘î ile mu‘arrefe olan mezbûre Zeyneb Hatun asâleten ve mezbûre Hadîce Hatun tarafından menzil-i âti’z-zikirde olan hissesini bey‘a bâ-hüccet-i şer‘iyye vekîli Halil Beşe b. Mahmud vekâleten ve sagīre-i mezbûrenin tesviye-i umûruna bâ-hüccet-i şer‘iyye vasiyy-i muhtârı el-Hâc Yusuf Ağa b. Mehmed vesâyeten meclis-i ma‘kūd-ı mezbûrda işbu bâ‘isü’l-kitâb el-Hâc Mehmed Ağa b. Mustafa tarafından şirâya vekîl-i müsecceli diğer el-Hâc Mehmed Ağa b. Mustafa mahzarında her biri bi’l-asâle ve bi’l-vekâle ve bi’l-vesâye ikrâr ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı idiği müsbet olup mahâlle-i mezbûrede vâki‘ bir tarafdan Haffâf el-Hâc İbrahim mülkü ve bir tarafdan ba‘zan Feyzullah Bey ve ba‘zan imam meşrûtası vakıf menzil ve bir tarafdan yine imam meşrûtası vakıf menzil ve bir tarafdan tarîk-i âm ile mahdûd hâriciyede fevkānî üç bâb oda ve bir dehliz ve bir âbdesthâne ve tahtında bir ahır ve bir kenîf ve bir mikdâr havlu ve bağçe ve dâhiliyede tabaka-i ulyâda iki bâb ve iki sofa ve bir köşk ve bir matbâh ve bir hamam ve bir câmekân odası ve bir kömürlük ve bir anbar ve bir zîr-i zemîn mahzen ve bir bi’r-i mâ ve [bir] mikdâr bağçeyi müştemil mülk menzil yedimde olan işbu izin hücceti mûcebince harâba müşrif olup hâsılı harcına vefâ etmediğinden mâ‘adâ verese-i kibâr hisselerini âhara bey‘a âzimler olmağla sagīre-i mezbûrenin menzil-i mezbûrda olan hissesi kendüye nef‘i ve birer vech üzere ifrâz dahi mümkin olmayıp hisse-i sagīre-i mezbûre ma‘an âhara bey‘ ve semeni istirbâh ve istiğlâl olunmak hakkında enfa‘ olmağın bi’l-izni’ş-şer‘î hâssa münâdîlerinden Üsküdarî Mehmed Çelebi b. Mustafa yediyle sûk-ı sultânî ve mecma‘-ı nâs olan mahâllerde kırk gün mikdârı nidâ ve müzâyede olunup rağabât-ı nâs bi’l-külliye munkatı‘a oldukdan sonra vekîl-i mezbûr el-Hâc Mehmed Ağa üzerinde üç bin dokuz yüz guruşda karâr edip ziyâde ile tâlib-i âhar zuhûr etmediğinden mâ‘adâ meblağ-ı mezbûr menzil-i mahdûd-ı mezbûrun el-yevm semen-i misli idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın menzil-i mahdûd-ı mezkûru bi’l-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile vekîl-i mezbûr el-Hâc Mehmed Ağa’ya meblağ-ı mezbûr üç bin dokuz yüz guruşa asâlet ve vekâlet ve vesâyetim hasebiyle bey‘ ve temlîk ve teslîm ol dahi ber-vech-i muharrer müvekkil-i mezbûr el-Hâc Mehmed Ağa için bi’l-vekâle iştirâ ve temellük ve tesellüm ve kabz ve kabûl edip semeni olan meblağ-ı mezbûr üç bin dokuz yüz guruşu vekîl-i mezbûr el-Hâc Mehmed Ağa yedinden bi-kad[ri]’l-hısas bi’t-tamâm ve’l-kemâl alıp kabz eyledik, ba‘de’l-yevm menzil-i mahdûd-ı mezkûr müvekkil-i mezbûr el-Hâc Mehmed Ağa’nın mülk-i müşterâsı olmuşdur, keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Mustafa Çelebi b. el-Hâc Hüseyin ve el-Hâc Veli b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 10 min-Recebi’l-ferd sene 1143 Şuhûdü’l-hâl: Ali Ağa b. Mehmed, el-Hâc Ebubekir b. Ali, Süleyman Beşe b. Şaban, el-Hâc İbrahim b. Derviş, el-Hâc Mustafa b. Hasan, İbrahim Çelebi b. Osman.