Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 421 Hüküm no: 350 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İshak Ağa’ya peşin olarak ödeyerek Resm-i Çuka Mukataası iltizamını üzerine alan Mehmed Ağa’nın, bu parayı terekeden talep etmesi Zînet-bahş-ı erîke-i ismet zîb-efzâ-yı mesned-i iffet devletlü re’fetlü Hadîce Sultân -dâmet ismetühâ ve istekarret azemetühâ- hazretlerinin kethüdâ-i muhteremleri iftihârü’l-emâcid ve’l-ekârim câmi‘u’l-mehâmid ve’l-mekârim sa‘âdetlü Mehmed Ağa b. Hüseyin Efendi b. Abdullah tarafından meblağ-ı âti’z-zikri da‘vâ ve ahz u kabza vekîl olduğu medîne-i Ebî Eyyûb Ensârî -aleyhi’r-rahmetü’l-meliki’l-bârî- mahâllâtından Zâl Paşa mahâllesi ahâlîsinden fahrü’l-kuzâti’l-Mısriye Mehmed Necib Efendi b. ( ) ve yine mahâlle-i mezbûre sükkânından Ahmed Çelebi b. Mustafa şehâdetleriyle mahzar-ı hasm-ı câhidde nehc-i şer‘î ve tarîk-i mer‘î üzere sâbit [ve] mütehakkık ve sübût-ı vekâletine hükm-i şer‘î lâhık olan işbu sâhibü’l-kitâbü’l-müstetâb Ahmed Efendi b. Mehmed meclis-i şer‘-i hatîr-i lâzimü’t-tevkīrde Dergâh-ı âlî kapıcıbaşılarından olup mahmiye-i İstanbul’da Kumkapı kurbünde Nişâncıpaşa mahâllesi ahâlîsinden iken bundan akdem katîlen vefât eden İshak Ağa b. Ali b. İshak’ın zevce-i menkûha-i metrûkesi ve evlâd-ı sıgārının vasiyy-i mansûbeleri olmağla terekesine bi’l-verâse ve bi’l-vesâye vâzı‘atü’l-yed olan Âişe bt. Mehmed b. Abdullah tarafından husûs-ı âti’l-beyanda vekîl-i müsecceli olan Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarlarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak hâl-i hayâtında mâlikâne mutasarrıf olduğu Resm-i Çuka Mukāta‘ası’nı bin yüz kırk dört senesi ibtidâsından gāyetine gelince mutasarrıf olmak üzere müvekkilim mûmâ-ileyh Mehmed Ağa’ya bedel-i ma‘lûm-ı müeccel mukābelesinde ilzâm edip müvekkilim mûmâ-ileyh dahi ba‘de’l-iltizâm ber-vech-i peşîn fâiz nâmıyla müteveffâ-yı mezbûr İshak Ağa’ya hayâtında medfû‘u olan üç bin yedi yüz elli guruşu merkūm İshak Ağa b. Ali b. İshak tamâmen ahz u kabz edip hattâ vech-i meşrûh üzere kabz eylediğini nâtık bin yüz kırk üç Saferi’l-hayrı târîhiyle müverrah kendü imzâ ve hatemini hâvî müvekkilim mûmâ-ileyh yedine bir kıt‘a temessük dahi verdikden sonra mâlikâne-i mezbûr kable hulûli’s-sene üzerinden ref‘ olunmağla müvekkilim için meblağ-ı mezbûru istîfâ müyesser olmayıp mezbûr İshak Ağa dahi kable’l-edâ fevt oldukda zimmetinde kalmağla terekesinden bi’l-vekâle taleb ederim, suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden fahrü’l-müderrisîni’l-kirâm Yusuf Efendi b. Abdüsselam ve yine medîne-i Eyüb’de mahâlle-i Zâl Paşa ahâlîsinden İbrahim Ağa b. Abdülmennan li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müvekkil-i mûmâ-ileyh Mehmed Ağa b. Hüseyin Efendi b. Abdullah mâlikâne-i mezbûru bin yüz kırk dört senesinde iltizâmen zabt etmek üzere ber-vech-i peşîn fâiz nâmıyla bin yüz kırk üç senesi Saferi’l-hayrı târîhiyle müverrah temessük-i mezkûr mantûkunca mezbûr İshak Ağa’ya bizim huzûrumuzda üç bin yedi yüz elli guruş def‘ u teslîm edip müteveffâ-yı mezbûr İshak Ağa b. Ali b. İshak dahi tamâmen ahz u kabz eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe tahlîfi’l-müvekkili’l-mûmâ-ileyh mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb ü tahrîr ve imlâ olundu. Fî 27 min-Recebi’l-ferd sene 1143. Şuhûdü’l-hâl: Ahmed Çelebi b. Mustafa, Ahmed Efendi b. Mehmed Kâtib-i mutasarrıf-ı müşârün-ileyh, İbrahim Ağa b. Abdullah Vekîl-i harc-ı Hazret-i Hadîce Sultân, Fahrü’l-kuzâti’l-Mısriye Mehmed Necib Efendi, Fahrü’l-müderrisîni’l-kirâm Mehmed Emin Efendi b. Ahmed Efendi, Fahrü’l-müderrisîni’l-kirâm Yusuf Efendi b. Abdüsselam, Hâfız İbrahim Efendi b. Hasan, Ma‘cunî el-Hâc Abdullah b. Ali, Ahmed Çelebi b. ( ) Muhzır-ı kısmet, Şâtır Hüseyin Çelebi b. İsmail