Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 489 Hüküm no: 414 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vefat eden Sandalcı İbrahim’de alacağı olduğu Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i şerîf-i enverden Mevlânâ el-Hâc İbrahim Efendi irsâl olunup ol dahi mahmiye-i İstanbul’da Esirci Kemâl mahâllesinde sâkin es-Seyyid el-Hâc Mehmed Ağa b. es-Seyyid Abdüsselam’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde bâ‘isü’l-kitâb mezbûr es-Seyyid el-Hâc Mehmed Ağa meclis-i ma‘kūd-ı mezkûrda mahmiye-i mezbûrede Saraç İshak mahâllesinde sâkin iken bundan akdem vefât eden Sandalcı es-Seyyid el-Hâc İbrahim b. es-Seyyid Abdüsselam’ın verâseti zevce-i menkûha-i metrûkesi Âişe Hatun bt. el-Hâc Mehmed ile sulbî kebîr oğulları es-Seyyid Evliyâ Mehmed ve es-Seyyid Halil ve sulbiye kebîre kızı Şerîfe Fahri Hatun’a münhasıra olduğu şer‘an zâhir ve mukarrer oldukdan sonra zâtları ta‘rîf-i şer‘î ile mu‘arrefe olan mezbûretân Âişe Hatun ve Şerîfe Fahri Hatun ile mezbûr es-Seyyid Evliyâ Mehmed mahzarlarında üzerlerine da‘vâ ve takrîr-i kelâm edip müteveffâ-yı mezbûr Sandalcı es-Seyyid el-Hâc İbrahim b. es-Seyyid Abdüsselam b. Yusuf zimmetinde beynimizde ma‘lûm yedinden müşterâ ve makbûz eşyâ-i mütenevvi‘a semeninden ba‘de-külli’l-hesâb [93b] üç yüz guruş hakkım olmağla meblağ-ı mezbûru tereke-i müteveffâ-yı mezbûrdan taleb ederim, suâl olunsun dedikde gıbbe’s-suâl mezbûrûn Âişe ve Şerîfe Fahri ve es-Seyyid Evliyâ Mehmed cevâblarında fi’l-vâki‘ mezbûr es-Seyyid el-Hâc Mehmed Ağa’nın müteveffâ-yı mezbûr Sandalcı es-Seyyid el-Hâc zimmetinde beynlerinde ma‘lûm yedinden müşterâ ve makbûz eşyâ-i mütenevvi‘a semeninden ba‘de-külli’l-hesâb üç yüz beş guruş hakkı olduğunu her biri bi-tav‘ihim ikrâr ve i‘tirâf etmeleriyle alâ-mûceb-i i‘tirâfihim meblağ-ı mezbûr üç yüz beş guruşdan hisselerine göre tereke-i müteveffâ-yı mezbûrdan mezbûr es-Seyyid el-Hâc Mehmed Ağa’ya edâ ve teslîme mezbûrûn Âişe Hatun ve Şerîfe Fahri Hatun ve es-Seyyid Evliyâ Mehmed’e tenbîh eylediğini mevlânâ-yı mezbûr mahâllinde tahrîr, ba‘dehû ma‘an irsâl olunan Hüseyin b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-Şa‘bân sene 1143. Şuhûdü’l-hâl: Ali Ağa b. Abdurrahman, el-Hâc Ali b. Osman, el-Hâc Mehmed b. Hüseyin, Yasin Efendi b. Ahmed, Hasan b. Mustafa