Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 85 Hüküm no: 39 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakaoğlu Mardıros’un Melkon v. Merze’yi vekil tayin etmesi Vekâlet Hücceti Mahmiye-i İstanbul’da Vâlide Hanı’nda mütemekkin sarrâf tâifesinden Sakaoğlu Mardıros v. Bağdisar zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Melkon v. Merze zimmî muvâcehesinde ikrâr-ı tam ve takrîr-i kelâm edip Yalova kazâsında sâkin iken bundan akdem fevt olan İshak Alemdar zimmetinde cihet-i karzdan bâ-defter ve iki kıt‘a temessük mûcebince yedi bin yüz on üç buçuk guruş alacak hakkım olup meblağ-ı mezbûru kable’l-ahz mezbûr İshak Alemdar fevt olmağla meblağ-ı mezbûru mahâllinde tereke-i müteveffâ-yı mezbûra vâzı‘ü’l-yed olanlardan taleb ve da‘vâ ve ahz ü kabza ve makbûzu bana îsâl ve teslîme tarafımdan mersûm Melkon zimmîyi vekîl nasb ü ta‘yîn eyledim dedikde ol dahi ber-vech-i muharrer vekâlet-i mezkûreyi kabûl ve merâsimi kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 10 S sene [1]242 Şühûdü’l-hâl: Es-Seyyid Emir Efendi b. Ahmed, İbrahim Reis b. Abdullah