Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 93 Hüküm no: 52 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Bebik’in Mehmed Ali Ağa’yı vekil tayin etmesi Vizeye vekâlet Mahmiye-i İstanbul’da Leblebici Hanı’nda mütemekkin sarrâf tâifesinden Babik veled-i Agob zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka Mehmed Ali Ağa b. Ahmed mahzarında ikrâr-ı tam ve takrîr-i kelâm edip Rumeli’nde Saray Vize kazâsında sâkin iken bundan akdem fevt olan Attârzâde Mustafa Ağa zimmetinde hayatında malımdan ikrâz ve kabz eylediği üç kıt‘a temessük ile on dokuz bin dokuz yüz elli guruş alacak hakkım olup meblağ-ı mezbûru kable’l-kabz mezbûr Mustafa Ağa fevt ve cemî‘ terekesini hayatında vasîyy-i muhtârı olup kazâ-i mezbûrda sâkin karındaşı Mehmed Ârif Ağa kabz ve vaz‘-ı yed etmekle alacağım olan meblağ-ı mezbûr on dokuz bin dokuz yüz elli guruşu mahâllinde tereke-i müteveffâ-yı mezbûra vâzı‘ü’[l-yed] olan vasîyy-i merkūm Mehmed Ârif Ağa’dan taleb ve da‘vâ ve ahz ü kabz ve makbûzunu bana teslîme merkūm Mehmed Ali Ağa’yı tarafımdan vekîl nasb ü ta‘yîn eyledim dedikde, ol dahi ber-vech-i muharrer vekâlet-i mezbûreyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 21 S sene [1]242 Şühûdü’l-hâl: Hüseyin b. Abdullah, Muhzır Mehmed Çelebi, Ahmed b. Abdurrahman