Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 376 Hüküm no: 431 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüzbaşı Mustafa Ağa’nın vasiyeti ve eşi Tayyibe’yi vasi tayin etmesi Vasiyet Vilâyet-i Anadolu’da Kastamonu sancağında Abana kazâsı ahâlisinden olup mahmiye-i İstanbul’da Sülüklü Çeşme kurbünde Kızlarağası mahallesinde sâkin Asâkir-i Mansûreden beşinci tertîbde sağdan birinci yüzbaşı [71a] Mustafa Ağa b. Mustafa meclis-i şer‘-i şerîf-i enverde hâlâ zevcesi olup ber-vech-i âtî vesâyâ-yı mu‘ayyenesini tenfîze vasî nasb ü ta‘yîn eylediği zâtı mu‘arrefe işbu bâ‘isetü’l-vesîka Tayyibe bt. Abdullah nâm hatun mahzarında ikrâr-ı tam ve takrîr-i kelâm edip ben bi-emrillâhi te‘âlâ vefât eylediğimde cemî‘ terekemi ve zimem-i nâsda olan hukūkumu zevcem mezbûre Tayyibe Hatun ahz ü kabz edip sünnet-i seniyye üzere techîz ve tekfînim görüp düyûn-ı müsbetem zuhûr eder ise ba‘de’l-edâ bākî kalan terekemin sülüsünü ifrâz ve sülüs-i mezkûrdan iki yüz guruş ile iki mushaf-ı şerîf iştirâ olunup müstahıkkīnden birer kimesneye verile ve sülüs-i mezkûrdan fazla kalır ise fazla-i mezkûre ile sülüsân terekemi dahi sümün hissesiyle ma‘an sulbî oğlum Ali nâm sagīr için ahz ü kabz eyleye deyü vasiyet ve tenfîzine zevcem mezbûre Tayyibe Hatunu vasîyy-i muhtâr nasb ü ta‘yîn eyledim dedikde, ol dahi ber-vech-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 25 Ş sene [1]242. Şühûdü’l-hâl: Mustafa b. Musa, Muhzır Ebûbekir Çelebi, Muhzır Ali Çelebi, Muhzır Şakir Ağa, İmâm-ı mahalle Hasan Efendi b. Ali.