Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 103 Hüküm no: 68 Orijinal metin no: [22a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mezid Çavuş b. Teymur, Mustafa b. Abdullah ve Karagöz b. Abdullah’ın mudârebe için merhûm Mahmud’a sermaye verdikleri Râcilin tâifesinden olan udûlden Mustafa b. Abdullah, Davud b. Abdullah, Mehmed b. Abdülmennân ve Mustafa b. Abdurrahman nâm kimesneler meclis-i şer‘-i şerîf-i ezherde hâzırûn olup, hâl-i hayâtında Atebe-i aliyye ve südde-i seniyyede vâki‘ otuz altıncı râcilin bölüğünden olup, bilâd-ı Rumeli-i ma‘mûreden Üsküb beldesine gider iken fevt olan merhûm Mahmud’un Süleyman nâm sagīr oğluna kıbel-i şerden mansûb vasî olan râcil Hasan b. Abdullah nâm hasm-ı câhid mahzarında, Mezid Çavuş b. Teymur ve Mustafa b. Abdullah er-râcil ve Karagöz b. Abdullah er-râcil nâm kimesnelerden sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezbûr Mezid Çavuş, müteveffâ-i merkūmun hâl-i hayâtında ona mudârebe-i şer‘iyye tarîki ile elli üç bin akçesini bizim yanımızda verip teslîm etmiş idi. Müdde‘î-i merkūm Karagöz de bu şekilde işletilmek üzre yedi bin akçesini vermiş idi. Allahü te‘âlânın bundan rızık olarak verdiğinin yarısı rabbü’l-mâlın diğer yarısı da mudârib-i mezbûrun olmak üzre anlaşmışlar idi. Müteveffâ-i mezbûr meblağı minhâc-ı mastûr üzre kabz edip tesellüm etti. Mezkûr davacılara meblağ-ı mezkûru müteveffâ-i merkūmdan veya vekîlinden kendilerinin veya vekîllerinin kısmen veya tamâmen almadıklarına, bi vechin mine’l-vücûh onu ibrâ etmediklerine yemîn verilmesinden sonra şehâdetleri ba‘de ri‘âyet-i şerâiti’l-kabûl inde’ş-şer‘ makbûl ve mûteber olmağın mûcibince hükmedildi. Cerâ fî 2 Ramazan sene-i mezbûre. Şuhûdü’l-hâl: Mustafa b. Abdullah er-râcil, Veli b. Abdullah er-râcil, Murad b. Abdullah el-muhzır, Hızır b. Abdullah el-muhzır ve gayruhüm Derkenâr: Üç hüccetden derc olunmuşdur.