Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 128 Hüküm no: 103 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş’un timarında, başka bir yerden gelip ziraat edenlerin vergilerine kayıtlı bulundukları yerin emininin el koyduğu ve iade etmesi gerektiği Dergâh-ı âlî çavuşlarından olup Pertekrek sancağında Suluveren nâm karyede sâkin Hüseyin Çavuş b. Abdullah nâm kimesne meclis-i şer‘-i refî‘ü’l-bünyâna livâ-i mezbûrda vâki‘ havâss-ı hümâyûndan Ersis nâm karyenin hâlâ emîni olan Ali Bey b. Ramazan nâm kimesneyi ihzâr ve mahzarında takrîr-i kelâm edip zikr olunan karye-i Suluveren benim timarım olup berâtım mûcebince öşrü ve rusûm-ı âdiyesine ben mutasarrıf iken mezbûr Ali Bey’in zikr olunan karye-i Ersis re‘âyâsından ba‘zı kimesnelerin benim timarım olan karye-i Suluveren’de bağları ve yerleri olmağla, bana âid olan öşürden beş yüz batman şirec ve on dört batman penbe ki bu cümlenin kıymeti cem‘an dört bin üç yüz otuz akçe eder, sene-i elf’de alıp kabz eylemişdir. Hâlâ taleb ederin suâl olunsun dedikde gıbbe’s-suâl mezbûr Ali Bey, fi’l-vâki‘ kaziyye minvâl-i meşrûh üzredir, zikr olunan şirecin ve penbenin kıymeti olan dört bin üç yüz otuz akçeyi mezkûr Hüseyin Çavuş’a teslîm ederin deyû kabzını tav‘an i‘tirâf etmeğin vâki‘-i hâl bi’t-taleb ketb olundu. Tahrîren fî evâhiri Şa‘bân sene 1002. Şuhûdü’l-hâl: Mustafa Çavuş b. Mehmed el-mübâşir, Ali b. Muharrem, Mirza Bey mirlivâ-i Pertekrek, Kurd Çavuş yörükân-ı âlî, Ömer b. Abdullah, Yakub Çavuş Erzurumî.