Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 135 Hüküm no: 115 Orijinal metin no: [30a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Kurd ve kardeşi Ramazan’a miras kalan ev, arsa ve tarlaların satış ve tasarruf devri için Kurd Mehmed b. Ali’ye vekalet verildiği Oldur ki, vilâyet-i Rumeli muzâfâtından Dırama kazâsına tâbi‘ Rahovika nâm karye ahâlîsinden olup hâlâ vezîr-i mükerrem müşîr-i müfehham Halil Paşa hazretleri hizmetinde olan işbu sâhibü’l-kitâb Mehmed b. Kurd ve li-ebeveyn karındaşı Ramazan nâm kimesneler meclis-i şer‘-i mutahhara hâzırân olup işbu nâkil-i kitâb-ı sıhhat-intisâb Kurd Mehmed b. Ali nâm kimesne mahzarında ikrâr ve i‘tirâf edip karye-i mezkûrede vâki‘ müteveffâ babamız mezkûr Kurd’dan bize irs-i şer‘le intikāl eden ev ve bağ ve sâir mülk olan akārdan hisse-i şâyi‘alarımızı bahâlarıyla âhara bey‘a ve semenin kabz ve îsâle ve kānûn üzre hakk-ı tasarrufu bize müntekıl olup lede’l-ahâlî ma‘lûmetü’l-hudûd olan mezâri‘ ve arâzi kısmının hakk-ı tasarrufun sâhib-i arz ma‘rifetiyle âhara tefvîz edip mukābele-i tefvîzde olan meblağı ahza ve bize îsâle mezkûr Kurd Mehmed’i kendi kıbelimizden vekîl nasb ve ta‘yîn eyledik dediklerinde, sâlifü’z-zikr Kurd Mehmed dahi bi’l-muvâcehe vekâlet-i merkūmeyi kabûl ve mûcebini mültezim oldum deyip vâki‘-i hâl gıbbe’s-suâl ketb olundu. Tahrîren fî 6 Ramazan sene-i mezbûre. Şuhûdü’l-hâl: El-Hâc Mahmud b. Abdullah kebeci, Haydar b. Zağanoz, Mürüvvet b. Hızır, Ahmed b. Abdullah ve gayruhüm.