Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 156 Hüküm no: 145 Orijinal metin no: [35b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Mehmed’in Halil Reis b. İbrahim’de alacağı olduğu Dergâh-ı âlî müteferrikalarından işbu sâhibü’l-kitâb İbrahim Ağa b. Mehmed tarafından husûs-ı âti’z-zikre nehc-i şer‘î üzre vekâleti sâbite olan Hüseyin b. Abdullah nâm kimesne meclis-i şer‘-i refî‘ü’l-erkâna Dergâh-ı âlî çavuşlarından kıdvetü’l-a‘yân Hacı Ali Çavuş mübâşeretiyle Halil Reis b. İbrahim nâm kimesneyi ihzâr ve mahzarında takrîr-i kelâm edip bundan akdem mezbûr Halil Reis zimmetinde müvekkilim müşârun-ileyh İbrahim Ağa’nın cihet-i karzdan kırk bin akçesi ve kirpas bahâsından dört yüz akçesi cem‘an kırk bin dört yüz akçe hakkı olup ba‘dehû bin akçesin müvekkilim alıp kabz edip hâlâ zimmetinde otuz dokuz bin dört yüz akçe bâkī kalmışdır, meblağ-ı mezbûru vekâleten taleb ederin dedikde, gıbbe’s-suâl sâlif[ü’z-zikr] Halil Reis kaziyye minvâl-i meşrûh üzre idiğini bi’l-muvâcehe tav‘an ikrâr ve i‘tirâf etmeğin cânib-i şer‘-i mutahhardan mübâşir-i mezkûr Hacı Ali Çavuş’a meblağ-ı merkūm otuz bin dört yüz akçeyi mukırr-ı mezbûrdan alıver deyû tenbîh olunup mâ vaka‘a bi’t-taleb ketb olundu. Tahrîren fî 7 min Şevvâl sene 1002. Şuhûdü’l-hâl: Hasan b. Abdullah, Ahmed b. Hüseyin, Mustafa b. Abdullah ve gayruhüm.