Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 159 Hüküm no: 151 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Nasuh ile Nazenin bt. Abdullah’ın emanet eşya davasında sulh olmaları Dârü’s-saltanati’s-seniyye mahmiye-i Kostantıniyye mahallâtından merhûm ve mağfûrun-leh Sultan Selim Hân mahallesinde sâkine Sâliha bt. Nasuh nâm hâtun meclis-i şer‘-i şerîfe hâzıra olup işbu râfi‘atü’l-kitâb Nâzenin bt. Abdullah nâm hâtun mahzarında takrîr-i kelâm edip bundan akdem ben âhar diyâra gittiğimde esâs-ı beytden cinsi ve adedi ma‘lûm bez? esbâbımı merkūme Nâzenin Hâtun yedinde emânet vaz‘ edip ba‘dehû geri bunda gelip esbâbımı mezbûreden taleb eylediğimde zikr olunan esbâbı Rüstem nâm bir acemi oğlanı bir mektûbla gelip aldı deyû bana teslîm etmeyip mâ-beynimizde nice nizâ‘ ve husûmet vâkı‘a olmuş idi. Hâlâ ıskāt-ı da‘vâ için mezbûre Nâzenin Hâtun bana on bin akçe teslîm edip ben dahi meblağ-ı mezkûru mezbûre hâtun yedinden alıp kabz edip husûs-ı mezbûra müte‘allik cemî‘-i da‘âvâdan rızâmla ferâğ eyledim, min ba‘d husûs-ı mezbûra müte‘allik benden da‘vâ sâdıra olursa mesmû‘a olmaya dedikde, mezkûre Sâliha Hâtun’un vech-i meşrûh üzre olan ikrâr ve i‘tirâfını mesfûre Nâzenin Hâtun vicâhen tasdîk ve şifâhen tahkīk edip vâki‘-i hâl bi’t-taleb ketb olundu. Tahrîren fî evâsıtı Şevvâl sene 1002. Şuhûdü’l-hâl: Mahmud b. Süleyman el-imâm bi mahalle-i Ali Paşa, Pervâne b. Abdullah el-mü’ezzin, Ali b. Siyami el-mü’ezzin, Mehmed Bey b. Abdullah el-cündî, Sefer Çelebi b. Hüseyin, Mustafa b. Mehmed.