Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 174 Hüküm no: 174 Orijinal metin no: [40b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Ahmed’in Kıbrıs asıllı câriyesini âzat ettiği Mevlâna Siyami Halîfe b. Mustafa el-İmâm, Mehmed b. Ahmed el-müezzin, Osman b. Süleyman ve Mehmed b. Abdullah er-râcil nâm kimesneler, Atebe-i aliyye ve südde-i seniyyede vâki‘, râciline mahsûs beytülmâlin emîni ve mahmiye-i Galata kazâsı tevâbi‘inden Kasımpaşa kasabası mahallâtından Kulaksız mahallesinde bundan akdem vefât eden merhûm Mustafa Bey b. Ahmed er-râcilin muhallefâtına vâzı‘-ı yed olan fahrü’l-a‘yân Mustafa Subaşı b. Osman mahzarında, Kıbrısiyyetü’l-asl, orta boylu, açık kaşlı, elâ gözlü, buğday tenli râfi‘a-i hâze’l-kitâb Mihriban bt. Abdullah nâm câriyeden sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, efendisi müteveffâ-i mezbûr Mustafa, hâl-i hayâtı ve kemâl-i akl ve nefâz-ı tasarrufâtında, taht-ı mülkiyyetinde bulunan müdde‘iyye-i mezkûreyi âzat ve tahrîr etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fi’l-yevmi’s-sâlis min Zilka‘de sene 1002. Şuhûdü’l-hâl: İbrahim b. Ali el-İmâm, Hasan Bey b. Abdullah, Hüseyin b. Yusuf, Ferhad b. Abdullah, Mehmed b. İsa, Hasan b. Abdullah zırh ustası