Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 182 Hüküm no: 187 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hançerlizâde denilen Mahmud Bey b. Kasım’ın Hüsrev Kethüdâ Vakfı’na olan borcunun bir bölümünü ödemediğinin tesbiti Mahmiye-i Kostantıniyye’de vâki‘ merhûm Hüsrev Kethüdâ Vakfı’na hâlâ mütevellî olan işbu râfi‘ü[’l-kitâb] el-Hâc Mehmed b. Osman nâm kimesne meclis-i şer‘-i şerîfe Hançerlizâde dimekle ma‘rûf Mahmud Bey b. Kasım nâm kimesneyi ihzâr ve mahzarında takrîr-i kelâm edip mütevellîsi olduğum vakf-ı mezbûr mâlından mesfûr Mahmud Bey zimmetinde cihet-i karzdan sâbıkan otuz bin akçe olup ba‘dehû on beş bin akçesin alıp hâlâ on beş bin akçesi zimmetinde bâkīdir, vakf için taleb ederin dedikde gıbbe’s-suâl mezkûr Mahmud Bey fi’l-vâki‘ vakf-ı mezkûr mâlından zimmetimde sâbıkan otuz bin akçe var idi. Lâkin ba‘dehû on beş bin akçesin mütevellî-i mezbûra teslîm eyledikden sonra bâkī kalan on beş bin akçeyi dahi vakf-ı mezbûrun nâzırı olan Mehmed Bey b. Abdullah’a teslîm edip zimmetimde bir akçe bâkī kalmadı dedikde nâzır-ı mezkûr bi’l-muvâcehe ihzâr olunup suâl olundukda zikr olunan on beş bin akçeyi merkūm Mahmud Bey yedinden kabz ve tesellümünü inkâr edip istişhâd olundukda merkūm Mahmud Bey ikāmet-i beyyineden âciz olup istihlâf etdikde nâzır-ı mezkûr Mehmed Bey meblağ-ı mersûmu sâlifü’z-zikr Mahmud Bey yedinden küllen ve ba‘zen bi vechin mine’l-vücûh kabz etmediğine yemîn billâh edip mâ hüve’l-vâki‘ bi’t-taleb ketb olundu. Tahrîren fî evâsıtı Ramazân sene 1002. Şuhûdü’l-hâl: Abdi Çavuş b. Mustafa el-mübâşir, Yakub Çavuş b. Süleyman, Hasan b. Abdullah, Murad b. Hızır.