Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 217 Hüküm no: 231 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Salamon’un Halep’teki alacaklarının vârisi olan David v. Avraham tarafından tamamen tahsil olunduğu Oldur ki, mahmiye-i İstanbul Yahudilerinden Kireoğlu dimekle ma‘rûf olup bundan akdem helâk olan Salamon nâm Yahudi’nin li-eb karındaşı ve vâris-i vâhidi olan David v. Avraham nâm Yahudi tarafından husûs-ı âti’z-zikre İbrahim Bey b. Abdullah el-bevvâbü’s-sultânî ve Rıdvan Bey b. Abdullah nâm kimesneler şehâdetleriyle vekâleti sâbite olan Yasef v. Avraham nâm Yahudi meclis-i şer‘-i şerîfe hâzır olup hâlik-i mezbûrun mahrûsa-i Haleb’de zimem-i nâsda vâki‘ olan hukūkun cem‘ ve tahsîli için fermân-ı hümâyûnla mübâşir ta‘yîn olunan işbu râfi‘ü’l-kitâb İbrahim Bey b. Abdullah el-bevvâbü’s-sultânî mahzarında takrîr-i kelâm edip bundan akdem mezbûr Salamon helâk oldukda zimem-i nâsda bâkī kalan emvâlin tahsîl için fermân-ı hümâyûnla umdetü erbâbi’l-ikbâl usvetü ashâbi’l-iz ve’l-iclâl müsâhib Mehmed Ağa mübâşir ta‘yîn olunup ba‘dehû hâlik-i mezbûrun mahrûsa-i Haleb’de vâki‘ olan emvâlini cem‘ ve tahsîl için müşârun-ileyh Mehmed Ağa kendi adamlarından Mehmed Çelebi ile mübâşir-i mezkûr İbrahim Bey’i irsâl eyledikde Haleb beylerbeyisi olan zü’l-kadri’r-râsih ve’ş-şerefi’ş-şâmih Mahmud Paşa hâlik-i merkūmun zimem-i nâsda olan emvâlinden tahsîl eylediği yedi yüz kâmilü’l-vezn ve sahîhü’l-ayâr kuruş mübâşir-i mezkûr İbrahim Bey’e teslîm etmeğin merkūm İbrahim Bey dahi meblağ-ı merkūmu getirip bi’t-tamâm müvekkil-i [54a] mesfûr David’e teslîm edip mezkûr David dahi meblağ-ı mesfûru hâlik-i mezkûrun dâyinlerine tevzî‘ ve taksîm için alıp bi’t-tamâm kabz edip meblağ-ı merkūma müte‘allik mesfûr İbrahim Bey ile alâkası kalmamışdır dedikde vekîl-i mezbûrun ikrâr-ı meşrûhun merkūm İbrahim Bey vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘de sene isneteyn ve elf. Şuhûdü’l-hâl: Mustafa Çavuş [b.] Hamza, Mustafa Çelebi [b.] Ali, Ömer Çavuş [b.] Hüseyin, Rıdvan Bey [b.] Abdullah ve gayruhüm.