Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 219 Hüküm no: 234 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle b. Abdullah’ın hür olduğu halde kendisini câriye diye tanıtan Saliha bt. Cafer için verdiği bedeli talebi Hüccet-i takrîr-i câriye Oldur ki, mahmiye-i Galata mahallâtından Câmi‘-i Kebîr mahallesinde sâkin işbu râfi‘ü’l-kitâb el-Hâc Piyâle b. Abdullah nâm kimesne meclis-i şer‘-i şerîfe işbu açık kaşlı gök gözlü orta boylu ak benizli Sâliha bt. Cafer nâm hâtunu ihzâr ve mahzarında takrîr-i kelâm edip bundan akdem mezkûre Sâliha’yı Ayşe nâm bir hâtun mülk câriyemdir deyû bana satmak istedikde mezbûre Sâliha’ya sen câriyemisin deyû suâl eylediğimde ben câriyeyin Rus asıllıyın, beni al deyû mağrûr eylediği ecilden mezbûre Sâliha’yı sâlifü’z-zikr Ayşe’den on bin akçeye satın almış idim. Lâkin merkūme Sâliha hâlâ benim yedimde iken şuhûd-ı udûl ile hürriyetin isbât edip bâyi‘a-i mezkûrenin yedi ma‘lûm olmamağla semenin taleb ederim suâl olunsun dedikde gıbbe’s-suâl mezbûre Sâliha hîn-i bey‘de ben câriyeyin, beni al dediğin inkâr edip istişhâd olundukda, udûl-ı Müslimînden Sefer Halîfe b. Ferhad el-imâm ve Murad b. Abdullah ve Mahmud b. Abdullah nâm kimesneler li ecli’ş-şehâde mahfil-i kazâya hâzırûn olup edâ-i şehâdet-i şer‘iyye edip fi’l-vâki‘ merkūme Ayşe Hâtun mezkûre Sâliha’yı câriyemdir deyû müdde‘î-i mezbûr el-Hâc Piyâle’ye meblağ-ı merkūma bey‘ eyledikde, mezbûre Sâliha bizim huzûrumuzda ben câriyeyin, Rus asıllıyın, beni al deyû mağrûr edip mezkûr el-Hâc Piyâle dahi meblağ-ı mezbûra iştirâ edip semenini bâyi‘aya teslîm eylemişdir. Biz bu husûsa şâhidleriz ve şehâdet dahi ederiz dediklerinde mezbûrânın şehâdetleri ba‘de’t-ta‘dîl hayyiz-i kabûlde vâkı‘a olup mâ hüve’l-vâki‘ bi’t-taleb ketb olundu. Tahrîren fî evâili Zilka‘de sene isneteyn ve elf. Şuhûdü’l-hâl: Ahmed b. Mahmud, İsa b. Abdurrahman, Yakub b. Mehmed ve gayruhüm.