Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 255 Hüküm no: 267 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peçuy sancağı beyi ile vefat eden Ali Bey’in Behruz Bey b. Abdülmennân’a olan borcuna Hüseyin Çavuş’un kefil olduğu Oldur ki, Dergâh-ı âlî müteferrikalarından olup mahmiye-i Kostantıniyye’de Yarhisar mahallesinde sâkin işbu râfi‘ü’l-kitâb mefharü’l-a‘yân Behruz Bey b. Abdülmennân meclis-i şer‘-i refî‘ü’l-bünyâna Dergâh-ı sa‘âdet-destgâh çavuşlarından fahrü’l-akrân Hüseyin Çavuş b. Abdullah nâm kimesneyi zahrü’l-a‘yân Abdi Çavuş mübâşeretiyle ihzâr ve mahzarında takrîr-i kelâm edip bundan akdem Peçuy sancağı beyi iken vefât eden merhûm Ali Bey zimmetinde elli iki bin akçe dört yüz zirâ‘ kemhâ bahâsından ve kırk sekiz bin akçe karzdan cem‘an yüz bin akçe hakkım olup, hâlâ mezbûr Ali Bey vefât edip meblağ-ı merkūm zimmetinde bâkī kalıp lâkin mezkûr Hüseyin Çavuş meblağ-ı merkūm yüz bin akçeye emr ve kabûlü hâviye kefâlet ile kefîl olmuşdur. Hâlâ kefâleti hasebiyle meblağ-ı mezbûru taleb ederin dedikde, gıbbe’s-suâl mezbûr Hüseyin Çavuş fi’l-vâki‘ müteveffâ-yı mezkûr Ali Bey’in zimmetinde merkūm Behruz Bey’e deyn olup bâkī olan yüz bin akçeye emr ve kabûlü hâviye kefâlet ile kefîl [oldum] deyû tav‘an ikrâr ve i‘tirâf etdikde, mâ hüve’l-vâki‘ bi’t-taleb [66b] ketb olundu. Tahrîren fî evâhiri Muharremi’l-harâm li sene selâse ve elf. Şuhûdü’l-hâl: Hasan b. Abdullah, Ahmed b. Hüseyin, Mevlânâ Mehmed b. el-Hâc Mehmed ve gayruhüm.