Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 265 Hüküm no: 280 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Bey b. Cafer’in alacağını kefil Mehmed b. Ali’den talebi Oldur ki, Dergâh-ı âlî kapucularından işbu râfi‘ü’l-kitâb fahrü’l-akrân Abdi Bey b. Cafer nâm kimesne meclis-i şer‘-i şerîfe Mehmed b. Ali nâm kimesneyi ihzâr ve mahzarında takrîr-i kelâm edip Hoca Nasuh b. Abdullah nâm kimesne zimmetinde metâ‘-ı ma‘lûm bahâsından on bin akçe hakkım olup meblağ-ı mezbûra emr u kabûlü hâviye kefâlet ile mezbûr Mehmed kefîl olmuş idi. Hâlâ meblağ-ı mezkûru kefâlet hasebiyle taleb ederin dedikde, gıbbe’s-suâl mezbûr Mehmed cevâb verip fi’l-vâki‘ meblağ-ı merkūma mezbûr Hoca Nasuh emriyle kefîl olmuşdum, lâkin ba‘dehû meblağ-ı mezbûru kefâleten merkūm Abdi Bey’e bi’t-tamâm teslîm eylemişdim dedikde, mezbûr Abdi Bey inkâr edip istişhâd olundukda, sâlifü’z-zikr Mehmed beyyine-i âdile ikāmetinden âciz olup mezbûr Abdi Bey’i tahlîfe tâlib olmağın, zikr olunan meblağı asîlden ve vekîlden küllen ve ba‘zen bi vechin mine’l-vücûh ahz etmediğine mezbûr Abdi Bey tahlîf olunup yemîn billâh ettikde, mâ hüve’l-vâki‘ bi’t-taleb ketb olundu. Fî 15 min Muharremi’l-harâm li sene selâse ve elf. Şuhûdü’l-hâl: Hasan [b.] Abdullah, diğer Hasan b. Abdullah, Ahmed [b.] Hüseyin, Mustafa [b.] Abdullah, Mehmed b. el-Hâc Mehmed ve gayruhüm.