Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 291 Hüküm no: 314 Orijinal metin no: [75b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hür olduğunu iddia eden Gülizar bt. Abdullah’ın bu durumunu ispatlayamadığı Oldur ki, işbu orta boylu açık kaşlı buğday enli kara gözlü Gülizar bt. Abdullah nâm câriye meclis-i şer‘-i şerîfe hâlâ mevlâsı olup kazâ-i Üsküdar’a tâbi‘ Bulgurlu nâm karyede sâkin Haydar b. Abdullah nâm korucuyu ihzâr ve mahzarında takrîr-i kelâm edip ben Rumeli’nde Mustafa Paşa Köprüsü nâm kasaba sâkinlerinden hürretü’l-asl olup babam Mustafa nâm hür ve anam Yeline nâm hürre ve benim ismim Ayşe olup bana ve vâlideynime bir vechile rık târî olmuş değil iken hâlâ mezbûr Haydar beni câriyemdir deyû mülkiyyet üzre tasarruf eder suâl olunsun dedikde, gıbbe’s-suâl merkūm Haydar mezkûre Gülizar’ın hürre idiğin inkâr edip istişhâd olundukda, ikāme-i beyyine için istimhâl edip mirâren mehil verilip bi’l-âhire mezbûre Gülizar beyyine-i âdile ikāmetinden aczine mu‘terife olmağın, mevlânâ-yı merkūm Haydar’a câriye-i mezkûreyi rıkkıyyet üzre istihdâm için kıbel-i şer‘den tenbîh olunup, mâ hüve’l-vâki‘ ketb olundu. Tahrîren fî evâsıtı Rebî‘ilevvel sene selâse ve elf. Şuhûdü’l-hâl: El-Hâc Hüseyin [b.] Abdullah, Hüseyin [b.] Abdullah, Ahmed Çavuş [b.] Nesimî, Mustafa [b.] Abdullah, Mehmed b. Pervâne, es-Seyyid Mehmed b. es-Seyyid Abdurrahman, Mehmed Çelebi [b.] Ahmed ve gayruhüm.