Bab Mahkemesi 54 Numaralı Sicil (H. 1102 / M. 1691) cilt: 20, sayfa: 181 Hüküm no: 194 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkâdir Efendi b. Musa Efendi’nin varislerinin kardeşi Abdürrezzak Efendi’ye olan borcunu ödemesi Zümre-i kudâtdan fahrü’l-kuzât Abdülkādir Efendi ibnü’l-merhûm Musa Efendi meclis-i şer‘-i şerîf-i enverde, birâderi olup Circe kadısı iken anda vefât eden Abdürrezzak Efendi b. el-merhûmü’l-mezbûr Musa Efendi’nin evlâd-ı sıgārı Ahmed ve Musa ve Ayşe’nin vâlideleri ve tesviye-i umûrları için meclis-i şer‘den mansûbe vasîleri olan işbu bâ‘isetü’l-kitâb Emine bt. Hüseyin nâm hâtun mahzarında ikrâr ve takrîr-i kelâm edip, müteveffâ-yı mezbûr Abdürrezzak Efendi’nin hâl-i hayâtında üç yüz otuz beş esedî guruş iktirâz ve kabz ve mukābelesinde işbu meclis-i şer‘den müşâhede olunan dokuz aded incili düğme ve on beş aded sagīr inci düğme ve sekiz altın düğme ve bir sîm kemer kuşak ve sekiz guruş kıymetli Frenk-bâb? ta‘bîr olunur dört dâne mücevher kuşak bâftesini yedine irhân ve teslîm, ol dahi irtihân ve kabz ve tesellüm edip yedine deyn temessükü verdikden sonra mezbûr Abdürrezzak Efendi mârru’z-zikr dört bâfteyi istihlâk eylediklerinden sonra fevt olmuşdur. El-hâletü hâzihî hâlâ bâlâda tafsîl olunan minvâl üzre olduğu sâbite ve müte‘ayyin olmağla mârru’z-zikr bâftelerin kıymet-i şer‘iyyeleri olan seksen guruş deyn-i mezbûrdan ol mikdâr takās olunup ve seksen beş guruşunu dahi hâlâ mezbûre Emine’ye işbu meclisde edâ ve teslîm ve rihân-ı mezbûru yedinden alıp kabz edip, mâ‘adâ yüz yetmiş guruşu zimmetinde lâzımü’l-edâ ve vâcibü’l-kazâ deynim olup, meblağ-ı mezbûr yüz yetmiş guruşu târih-i kitâbdan dört yüz yirmi gün tamâmında edâsı[nı] iltizâm eyledim dedikde, gıbbe’t-tasdîki’l-mu‘teber mezbûrun sulbî oğlu Abdullah Efendi deyn-i mezbûra emr ü kabûlü hâviyeye kefâlet-i sahîha-i şer‘iyye ile kefîl olmağın, mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire sene li sene isneteyn ve mi’e ve elf. Şuhûdü’l-hâl: Abdurrahman Efendi b. Sefer, Eyüb Ağa b. Mehmed, Mustafa Çelebi b. Veli, İbrahim Çelebi b. Mustafa, Ebûbekir Çavuş el-mübâşir, Mehmed Çelebi b. Hasan, Mustafa Çelebi b. Veli, Abdülbâki Çelebi b. Mustafa.