Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 122 Hüküm no: 102 Orijinal metin no: [19b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Mustafa b. Abdullah’ın evini sarrâc-ı hâssa İsa Çelebi b. Mehmed’e sattığı Dârü’s-saltanati’s-seniyye mahmiye-i Kostantıniyye mahallâtından Kazancı Sadi mahallesi ahâlîsinden Kasab Mustafa b. Abdullah nâm kimesne meclis-i şerî‘at-i şerîfe-i garrâ ve mahfil-i tarîkat-i münîfe-i zehrâda hâzır olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i merkūmede kâin, tahtânî iki beyti, ahırı, su kuyusunu, eşcâr-ı müsmire ve gayr-ı müsmireyi hâvî avluyu müştemil olan, bir tarafdan Ali Beşe er-râcil mülkü, diğer tarafdan Debbâğlar zâviyesi, öteki tarafdan müezzin-i mahalleye vakfedilmiş menzil ve diğer tarafdan da tarîk-i hâs ile mahdûd bulunan menzilini cümle hudûdu ve tevâbi‘i ve kâffe-i menâfi‘ ve mürâfıkı ile râyicü’l-vakt yirmi dokuz bin akçe semen-i mu‘ayyen-i makbûzla sarrâcîn-i hâssadan hâfız-ı kitâb İsâ Çelebi b. Mehmed’e îcâb kabûlü ve teslîm tesellümü hâvî bey‘-i bât-ı sahîh ile bey‘ ettiğini ikrâr ve i‘tirâf etti. O da kendi mâlıyla ve kendisi içim menzil-i mezkûru ondan iştirâ etti. Vâki‘ ikrâr, müşterî-i merkūm tarafından vicâhen ve şifâhen tasdîk edildi. Cerâ zâlike fi’t-târihi’l-mezbûr. Şuhûdü’l-hâl: Umdetü’l-kuzât Mehmed Efendi b. Mehmed el-kadı, Ahmed Halîfe el-İmâm, Ali Bey b. Abdülganî, Mehmed Halîfe el-Müezzin, Ahmed Halîfe b. Ali Çavuş, Mehmed b. Abdullah, Ömer Efendi b. Mehmed, İdris b. Abdullah, Mustafa Efendi b. Mehmed, Ali b. Mustafa, Ahmed b. Abdullah, Zülfikar b. Abdullah, Yusuf Dede b. Abdullah