Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 135 Hüküm no: 114 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mültezim Mehmed Çavuş’un İstanbul bâdiye-i gebrân, ispençe ve resm-i bennâk vergilerinin tahsilindeki engelleri kaldırmayı taahhüt ettiği Mahmiye-i Kostantıniyye’de vâki‘ bâdiye-i gebrân ve ispençe ve resm-i bennâk mukāta‘asının ber vech-i iltizâm emîni olan bâ‘isü’l-kitâb Mehmed Çavuş nâm kimesne meclis-i şer‘de, mahmiye-i merkūme ahâlîsinden Mahmud Bey b. Mehmed el-Cündî ve Mehmed Beşe b. Ali er-Râcil mahzarında takrîr-i da‘vâ edip, bundan akdem bin kırk iki senesi Recebü’l-müreccebi gurresinden bin kırk üç Recebü’l-harâmı gurresine değin mukāta‘a-i merkūmenin bir senesi on yük akçeye taht-ı iltizâmımda olmakla, mezbûrân Mahmud Bey ve Mehmed Beşe müddet-i mersûme tamâmına değin zikr olunan on yük akçeye der-uhde eylediğimde merkūmân dahi ber vech-i iştirâk kabûl edip elân tasarruflarında olmakla, zikr olunan on yük akçe taraf-ı mîrîye ber vech-i peşîn teslîm olunmak iktizâ etmekle ben dahi merkūmân Mahmud Bey ve Mehmed Beşe’den taleb eylediğimde mezbûrân dahi meblağ-ı merkūmun altı yük yirmi sekiz bin akçesini teslîm edip mâ‘adâsını teslîmden imtinâ‘ ederler, hakīkat-i hâl mezbûrândan suâl olunup takrîrleri tahrîr olunmak taleb ederim dedikde, gıbbe’s-suâl mezbûrân Mahmud Bey ve Mehmed Beşe cevâblarında, fi’l-vâki‘ mukāta‘a-i merkūmeyi müddet-i mersûme tamâmına değin ber vech-i iştirâk on yük akçeye iltizâm edip elân tasarrufumuzda olmakla, meblağ-ı merkūmun ber vech-i peşîn altı yük yirmi sekiz bin akçesini teslîm eyledik. Lâkin yedimizde olan emr-i şerîfde mastûr olduğu üzre mukāta‘a-i mersûmenin tevâbi‘-i kadîmesinden olan sultânlar hâsları ve vüzerâ hâsları ve evkāf-ı selâtîn karyeleri re‘âyâsının bâdiye olanlarının rusûm-ı mu‘tâdesini cem‘e olıgelmişe muhâlif ba‘zı mevâni‘ zuhûr etmekle ancak teslîm eylediğimiz elli yük yirmi sekiz bin akçe mikdârı tahsîline imkân vardır, eğer zikr olunan re‘âyânın rusûm-ı mu‘tâdenin cem‘e mâni‘ olunmaz ise taht-ı iltizâmımızda olan on yük akçeyi tekmîl ederiz ve illâ ziyâdeye kādir değiliz dediklerinde, sâlifü’z-zikr Mehmed Çavuş dahi def‘-i mevâni‘e müte‘ahhid olduğu bi’t-taleb ketb ve tahrîr olundu. Tahrîren evâ’ili Saferi’l-muzaffer li sene selâsin ve erba‘în ve elf. Şuhûdü’l-hâl: Es-Seyyid Mustafa b. Ali gulâm-ı şâhî, Ali Bey b. Abdülkerim gulâm-ı şâhî, Mustafa Bey b. Sinan gulâm-ı şâhî, Mustafa Bey b. Mehmed gulâm-ı şâhî.