Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 157 Hüküm no: 144 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ali’nin alacak talebinin zaman aşımı sebebiyle reddi Mahrûse-i İstanbul’da Altımermer kurbunda sâkin Mustafa Çelebi b. Ali meclis-i şer‘-i şerîfde, mahrûse-i merkūmede sâkin iken bundan akdem vefât eden merhûm Murad Çavuş b. Mehmed’in sulbî oğlu ve hasran vârisi olan fahrü’l-akrân İbrahim Ağa mahzarında üzerine takrîr-i da‘vâ edip, bin yirmi altı senesinde bi’l-fi‘il Kastamonu nâzırı olan Mehmed Çavuş nâm kimesneye mâl-ı hâlisimden bi tarîki’l-karzi’ş-şer‘î bin sikke-i hasene verip, ol dahi iktirâz ve kabûl eyledikden sonra müteveffâ-yı mezbûr Murad Ağa meblağ-ı mersûma tarafeynden emr ve kabûlü hâviye kefâlet ile kefîl olduğundan mâ‘adâ mersûm Murad Ağa kendinin taht-ı tasarrufunda olan vilâyet-i Anadolu’da nefs-i İznikmid’de Topyeri demekle ma‘rûf mevzi‘de vâki‘ lede’l-ahâlî ve’l-cîrân ma‘lûmü’l-hudûd olan vakıf çiftliği bana meblağ-ı mersûm mukābelesinde rehin vaz‘ etmişdir. Hâlâ mezbûr Murad Ağa vefât edip muhallefâtına oğlu mezbûr İbrahim Ağa vaz‘-ı yed etmeğin, meblağ-ı merkūm bin sikke altını mezbûr İbrahim Ağa’dan taleb ederim dedikde, müdde‘î-i mezbûr Mustafa Çelebi’nin takrîri üzre vakfın rehin olması câiz olmadığından mâ‘adâ üzerinden bilâ-özr-i şer‘î bu mikdâr zamân mürûr eden da‘vâ bilâ-emr istimâ‘ olunmayıp mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Saferi’l-hayr li sene selâsin ve erba‘în ve elf. Şuhûdü’l-hâl: Mustafa Bey b. Abdullah el-bevvâbu’s-sultânî, Abdurrahman Çelebi b. Hüseyin el-Müezzin, Ahmed Ağa b. Mustafa el-Müezzin, Ahmed Çelebi b. Hüseyin, Hüseyin Çelebi b. Hüsrev, Receb Çavuş [b.] Ali, Ali Çelebi b. ( ), Ahmed Bey b. Osman, Ali Çavuş, Osman Çelebi b. Yusuf Bey.