Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 209 Hüküm no: 216 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Ağa ve oğlu Mehmed Ağa’nın boş arazilerini defter emini İsmail Efendi’ye sattığı Mahmiye-i İstanbul’da Muhtesib Karagöz mahallesinde sâkin iken bundan akdem müteveffât olan Fâtıma bt. Mehmed Ağa nâm hâtunun verâseti, zevc-i metrûkü umdetü’l-emâcid ve’l-a‘yân makbûlü’s-sudûr ve’l-erkân Kurd Ağa’ya ve sadrî oğlu olup sin ve cüssesinin bülûğa tahammülü olmamakla bülûğuna mu‘terif olan Mehmed Ağa b. Kurd Ağa nâm şâbb-ı emrede münhasıra olduğu şer‘an mütehakkık oldukdan sonra müşârunileyhimâ Kurd Ağa ve Mehmed Ağa taraflarından vech-i âtî üzre bey‘ ve kabz-ı semeni ikrâra vekîl olup, vekâleti mahzar-ı hasm-ı câhidde Salih Bey b. Mehmed ve İshak b. Mustafa nâm kimesneler şehâdetleri ile sâbite olup yeniçeri ocağı çavuşlarından olan Hüseyin Çavuş b. Mustafa nâm kimesne meclis-i şer‘-i hatîr-i lâzımü’t-tevkīrde, hâlâ atebe-i aliyyede Defter Emîni olan işbu râfi‘ü’l-kitâb umdetü’l-emâcid ve’l-ekârim câmi‘u’l-mehâmid ve’l-mekârim İsmail Efendi b. ( ) tarafından ikrâr-ı âti’l-beyânı tasdîka vekîl olup, vekâleti mahzar-ı hasm-ı câhidde şâhidân-ı merkūmân şehâdetleri ile sâbite olan fahrü’l-kuzâti’l-İslâm Ahmed Efendi b. Receb mahzarında bi’l-vekâle ikrâr ve takrîr-i kelâm edip, mahmiye-i merkūmede Küçükpazar kurbunda Koca Muhyiddin mahallesinde vâki‘ olup, bir tarafı Uzun Ahmed mülkü ve bir tarafı Rum Mehmed Paşa Vakfı’ndan olan Horasancı odaları demekle ma‘rûfe olan hucurât ve bir tarafı mûmâ-ileyh İsmail Efendi ve ba‘zan Aişe Hâtun bt. Sinan Çelebi mülkleri ve bir tarafı tarîk-i âm ile mahdûd olup, müvekkilân-ı merkūmâna mûriseleri mezkûre Fâtıma Hâtun’dan irs-i şer‘î ile intikāl eden mülk arz-ı hâliyeyi, cümle hudûd ve kâffe-i hukūku ile müvekkil-i mûmâ-ileyh İsmail Efendi’ye on bin nakd-i râyic fi’l-vakt akçe ile adedi ma‘lûm ve ba‘de’l-kabz meclis-i mübâya‘ada mudî‘a bir kabza filoriye bey‘-i kat‘î ile bey‘ ve teslîm eyledikde, mûmâ-ileyh İsmail Efendi dahi vech-i meşrûh üzre iştirâ ve kabûl eyledikden sonra müvekkilân-ı merkūmân semen-i merkūmu bi’t-tamâm ve’l-kemâl müşârunileyh İsmail Efendi’nin yedinden alıp kabz ve tesellüm eyledi. Min ba‘d zikr olunan arz-ı hâliye mûmâ-ileyh İsmail Efendi’nin mülk-i müşterâsıdır, keyfe mâ yeşâ ve yehtâr mutasarrıf olsun dedikde, mukırr-ı merkūm Hüseyin Çavuş’un bi’l-vekâle sudûr eden i‘tirâfını merkūm Ahmed Efendi bi’l-vekâle vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ilevvel li sene selâsin ve erba‘în ve elf. Şuhûdü’l-hâl: Fahrü’l-kuzât Mehmed Efendi b. Mehmed el-kadı, Osman bey b. Veli el-Cündî, Ali Efendi b. Abdullah el-Müderris, Piyâle Çavuş b. Abdullah, Mehmed Çelebi b. Mustafa el-bevvâbü’s-sultânî, İbrahim Çelebi b. Yakub el-bevvâbü’s-sultânî, Yusuf bey b. Abdullah el-Cündî, Hamza Bey b. Abdullah el-Cündî, İbrahim Ağa b. ( ) el-müteferrika, Mehmed Efendi b. Mustafa el-mütekā‘id, Ali Bey b. Abdullah el-Cündî.