Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 251 Hüküm no: 264 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âkile bt. Abdullah’ın muhafaza için Zamâne bt. Abdullah’a bıraktığı elbiselerin çalındığı Mahmiye-i Kostantıniyye’de Firuz Ağa mahallesinde sâkine Âkile bt. Abdullah nâm hâtun meclis-i şer‘de, kendinin icâre ile sâkine olduğu menzilin mûciresi olan bâ‘isetü’l-kitâb Zamâne bt. Abdullah nâm hâtun mahzarında takrîr ve da‘vâ edip, ben merkūme Zamâne Hâtun’un mahalle-i merkūmede vâki‘ menzilde icâre ile sâkine olmağın târih-i kitâbdan beş ay mukaddem Bayram Paşa Alayı vâki‘ olduğu gün ben ba‘zı mesâlih için âhar yere gittiğimde sâkin olduğum menzilin miftâhını menzil-i merkūm dâhilinde mersûme Zamâne Hâtun’a teslîm edip, ben gelinceye değin yabana gitme menzil-i mesfûr dâhilinde olan esbâbımı muhâfaza eyle dediğimde, merkūme Zamâne Hâtun dahi zikr olunan miftâhı alıp kabz edip esbâbımı muhâfazaya ta‘ahhüd ve iltizâm etmiş iken ba‘de zamân menzil-i merkūmu hâlî koyup âhar yere gitmekle sâkin olduğum menzilimin kilidleri kırılıp dâhilinde on beş bin akçe kıymetli esbâbım zâyi‘ olmuşdu. Hâlâ merkūme Zamâne Hâtun’un taksîri sebebiyle tazmîn ettirilmek taleb eylerim dedikde, gıbbe’s-suâl mezbûre Zamâne Hâtun cevâbında, fi’l-vâki‘ müdde‘iyye-i merkūme Âkile Hâtun târih-i merkūmda âhar yere gidip bana menzil-i merkūmdan âhar yere gitme deyü tenbîh edip gittiğinden sonra ba‘de salâti’z-zuhr taşra gitmek iktizâ etmekle ben dahi gitmiş idim, minvâl-i meşrûh üzre merkūmenin menzil miftâhını alıp zabt eyledikden mâ‘adâ esbâbını dahi muhâfazaya ta‘ahhüd ve iltizâm eylemedim idi deyü inkâr edicek müdde‘iyye-i merkūme Âkile Hâtun’dan müdde‘âsına mutâbıka beyyine taleb olundukda ityân-ı beyyine için istimhâl etmeğin müd‘iye-i merkūme Âkile Hâtun dahi işbu târih-i kitâbdan üç gün tamâmına değin mehl-i şer‘î ile imhâl olunup, sûret-i hâl gıbbe’t-taleb ketb olundu. Tahrîren fî gurreti Zilhicceti’ş-şerîfe min şuhûri sene isneteyn ve erba‘în ve elf. Şuhûdü’l-hâl: Hüseyin Efendi b. Mustafa el-Müderris, Mehmed Çelebi b. el-Hâc Hüsam el-Müezzin, Mustafa b. Mehmed, İskender Bey b. Şaban, Haydar Bey b. Abdullah ve gayruhüm.