Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 274 Hüküm no: 295 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayim ve İsak’ın Mahmud Beşe b. Mustafa’ya borçlu olduğu Mahmiye-i Kostantıniyye’de yahud mahallâtından olup Argon cemâ‘atinden olan Hayim v. Mosi nâm Yahudi ile şerîki olup Balıkpazarı mahallesinden ve Sebatay cemâ‘atinden olan İsak v. Harun nâm Yahudi meclis-i şer‘-i hatîr-i lâzımü’t-tevkīrde, dergâh-ı âlî yeniçerilerinden işbu hâfızu’l-kitâb Mahmud Beşe b. Mustafa nâm kimesne mahzarında bi tav‘ihâ ikrâr ve takrîr-i kelâm edip, mezbûr Mahmud Beşe’ye ber vech-i iştirâk nev‘i ve zirâ‘ı beynimizde ilm-i şer‘î ile ma‘lûm çuka bahâsından târih-i kitâbdan yüz seksen gün tamâmına değin müeccel kırk üç bin akçe lâzımü’l-edâ deynimiz olmakla ve deyn-i merkūmun nısfı olan yirmi bir bin beş yüz akçesi târih-i merkūm ibtidâsından doksan gün tamâmında ve nısf-ı âharı olan yirmi bir bin beş yüz akçeyi dahi müddet-i merkūme ahırında bi’l-iştirâk edâ ve îfâya ta‘ahhüd eyledik dediklerinde, mukırrân-ı merkūmân Hayim ve İsak’ın minvâl-i muharrer üzre sudûr eden i‘tirâflarını dâyin-i merkūm Mahmud Beşe dahi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Tahrîren fi’l-yevmi’l-hâmis aşer min şehri Rebî‘ilâhir min şuhûri sene selâsin ve erba‘în elf. Şuhûdü’l-hâl: Hüseyin b. Ahmed, Yahya b. Zekeriya, Piyâle Çavuş b. Abdullah, Mansur b. Hamza, Mehmed Beşe b. Yusuf er-Râcil, Behrâm Bey b. Abdüsselâm, Yusuf Bey b. Şaban, Yusuf b. Abdullah.