Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 276 Hüküm no: 298 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer ve Mustafa b. Murad’ın Mehmed b. Ahmed’in evini bey‘ bi’l-istiğlâl yoluyla satın aldıkları ve vadesi dolunca geri sattıkları Mahmiye-i İstanbul’da Müftî Ali Çelebi mahallesinde mukaddemâ müteveffâ olan Murad b. ( ) nâm kimesnenin sulbî sagīr oğulları Ömer ve Mustafa’nın kıbel-i şer‘den mansûb vasîleri olan Hasan Bey b. Abdullah nâm [kimesne] mahfil-i kazâda, mahmiye-i mezbûrede Kâtib Kasım mahallesinde sâkin râfi‘ü’l-kitâb Mehmed b. Ahmed nâm mahzarında ikrâr ve takrîr-i kelâm eyleyip, mesfûr Mehmed yedinden esbak bin kırk iki senesi Zilhicce’sinin yirminci gününde mahalle-i mezbûrede vâki‘ bir tarafı Siyâmi Efendi b. Emir el-İmâm ve bir tarafı Abdurrahman Halîfe b. ( ) el-Müezzin mülkü ve bir tarafı Ahmed Ağa mülkü ve bir tarafı tarîk-i âm ile mahdûd büyût-ı müte‘addideyi müştemil olan mülk menzilini, bana altmış bin fıddî ve râyic fi’l-vakt akçeye bey‘-i şer‘le bey‘ edip ben dahi sagīreyn-i mezbûreyn mâllarıyla bi tarîki’l-istiğlâl iştirâ ve tahliye ve tarafeynden tekābuz-ı bedeleynden sonra yine menzil-i mezbûru târih-i mezkûrdan sene tamâmına değin on beş bin akçe ücret-i mu‘ayyene ile mezkûr Mehmed’e îcâr edip, ol dahi istîcâr etmişdi. Hâlâ asl-ı mâl-ı merkūmu ve târih-i kitâba gelince ücret-i menzil-i mastûru mezbûr Mehmed yedinden bi’t-tamâm alıp kabz eyleyip fekk-i rehin eyledim. Min ba‘d sagīreyn-i mezkûreynin menzil-i mezbûrda alâkaları kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâili Cemâziyelevvel li sene selâsin ve erba‘în ve elf. Şuhûdü’l-hâl: İskender Bey b. Abdullah, Yunus Bey b. Ali, Mehmed Bey b. Ahmed, Sinan b. Abdullah.