Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 118 Hüküm no: 106 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in sabun imâl ettiği yağhanesindeki bazı eşyalarını sattığı Mahmiye-i İstanbul’da Samanviran mahallesi sükkânından Mehmed b. Ahmed nâm kimesne meclis-i şer‘-i şerîfde, sabuncu tâifesinden Halil Dede b. İsmail ve Maden b. Abdi ve Mehmed b. Abdi mahzarlarında tav‘an ikrâr ve i‘tirâf edip bundan akdem silk-i mülk ve yedimde muntazam olup mahmiye-i mezbûrede Silivrikapısı dâhilinde İbrahim Paşa mahallesinde Koyun Emîni Vakfı olup lede’l-ahâlî ma‘lûmü’l-hudûd yağhânede vâki‘ bir sabun kazganımı ve üç sabun fıçımı kâffe-i hukūkuyla mezbûrûn Halil Dede ve Maden ve Mehmed’e bin sekiz yüz fıddî râyic fi’l-vakt akçeye bâtten bey‘ ve teslîm edip onlar dahi nefisleri için iştirâk-i seviyy üzre iştirâ ve tesellüm edip semen-i mezbûrdan yedi yüz akçesini bana def‘ ü teslîm edip ben dahi ahz eyleyip bâkī bin yüz akçe hakkım kalmışdı. El-hâletü hâzihî meblağ-ı bâkī bin yüz akçeyi dahi tamâmen ahz u kabz eyledim. Min ba‘d semen-i mezkûra müte‘allika ve zikr olunan kazgan ve fıçılara müte‘allika ve zikr olunan yağhânede olan sabun kârhânesine müte‘allika mezbûrûn üzerlerine bi vechin mine’l-vücûh ve sebebin mine’l-esbâb da‘vâ ve nizâ‘ ve alâkam kalmadı dedikde, mukırr-ı mezbûru ikrâr-ı meşrûhunda mezbûrun Halil Dede ve Maden ve Mehmed vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mehmed b. Eyyûb, Mehmed b. İbrahim, Mehmed Çelebi b. Süleyman, Ahmed Çelebi b. Osman.