Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 204 Hüküm no: 218 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bey b. Ömer’in çiftliğini Mustafa Paşa’ya sattığı Vilâyet-i Rumeli’nde Niğbolu nâm kasaba-i Sevri dâhilinde sâkin Osman Bey b. Ömer nâm kimesne meclis-i şer‘-i şerîfde düstûr-ı mükerrem müşîr-i mufahham Mustafa Paşa tarafından ikrâr-ı âti’l-beyânı tasdîka sâbitü’l-vekâle vekîli olup Kapıcılar Bölükbaşısı olan el-Hâc Halil Ağa b. Mahmud nâm kimesne mahzarında tav‘an ikrâr ve i‘tirâf edip işbu akdin sudûruna silk-i mülkümde münselik ve yedimde hakkım olan kasaba-i mezbûre kazâsına tâbi‘ İslatine nâm karyede vâki‘ bir tarafı Veli Çelebi b. Çelebi mülküne ve bir tarafı cebele ve iki tarafı tarîk-i âmma müntehî büyût-ı müte‘addideyi ve on kıt‘a bağı ve bir bahçeyi müştemil cemî‘ çiftlik ta‘bîr olunur menzilimi âmme-i hukūkuyla Paşa-yı mûmâ-ileyhe otuz bin fıddî cedîd râyic fi’l-vakt akçeye târih-i kitâbdan yüz seksen gün tamâmına değin müeccele bi’l-vefâyla bey‘ edip ol dahi minvâl-i meşrûh üzre iştirâ eyledikden sonra semen-i merkūm otuz bin cedîd akçeyi paşa-yı mûmâ-ileyhin yedinden tamâmen alıp [kabz] edip paşa-yı mûmâ-ileyh mârrü’z-zikr çiftliği cümle hukūkuyla mahallinde kabza taslît eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Mehmed Kethüdâ, Osman Bey b. Mehmed, Ahmed b. Hamza, İbrahim Efendi b. Şaban, Mustafa b. Mehmed.