Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 171 Hüküm no: 114 Orijinal metin no: [17b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdüllatif Çelebi b. Gülabi’nin Aksaray’a bağlı Yarımca köyüne ait merayı ziraat etmesine izin verilmediği Vilâyet-i Anadolu’da Aksaray kazâsına tâbi‘ Yarımca nâm karye ahâlîsinden işbu bâ‘isü’l-vesîka Hasan b. Musa ve Mustafa b. İbrahim nâm kimesneler meclis-i şer‘-i hatîr-i lâzimü’t-tevkīrde Seyyid Abdüllatif Çelebi b. Gülabi nâm kimesne mahzarında üzerine da‘vâ ve takrîr-i kelâm edip karye-i mezbûre sınırı dâhilinde vâki‘ Yapılcan’a giden tarîk-ı âmma ve bir tarafı Ulubend’e ve bir tarafı Çatak nâm mezra‘a kurbünde vâki‘ olan mevzi‘a müntehî mer‘â kadîmü’l-eyyâmdan mezra‘a olmayıp altmış seneden beri târih-i kitâba gelince ahâlî-i karye-i mezbûrenin devâb ve mevâşîleri ra‘y olunagelmişken hâlâ mezbûr Seyyid Abdüllatif Çelebi zikri mürûr eden mer‘âya çift koyup zirâat etmekle târih-i kitâb senesi Şa‘bânü’l-mu‘azzamının evâilinde zikrolunan Aksaray’da hilâfeten müvellâ olan Mevlânâ Mahmud Efendi huzûrunda mezbûr Seyyid Abdüllatif Çelebi’den zikrolunan mer‘âda altmış seneden beri zirâ‘at olunmayıp ahâlî-i karye-i mezbûrenin devâb ve mevâşîleri ra‘y olunageldiğini da‘vâ ve muvâcehesinde şühûd-ı udûlle isbât edip mûcibiyle mevlânâ-yı mezbûr merkūm Seyyid Abdüllatif Çelebi’ye zikrolunan mer‘âdan kasr-ı yedine tenbîh eylemişidi hâlâ mezbûr Seyyid Abdüllatif Çelebi yine zikrolunan mer‘âyı mezra‘ası olmak üzere tasarruf eder suâl olunup men‘ olunması matlûbumuzdur deyu târih-i mezbûr ile müverraha ve mevlânâ-yı mezbûrun hat ve hatemini hâviye hüccet-i şer‘iyye ibrâz edip gıbbe’s-suâl mezbûr Seyyid Abdüllatif Çelebi cevâbında mazmûn-ı hüccet-i merkūmeyi bi-tav‘ihî mu‘terif olmağın mûcibiyle zikrolunan mer‘âdan mezbûr Seyyid Abdüllatif Çelebi’nin kasr-ı yedine tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Seyyid Hasan Çavuş b. Seyyid Ali el-mübâşir, Osman Beşe çukadâr, İsa Bey b. Ahmed, İsmail b. Yunus, Ca‘fer Bey b. Abdullah ve gayruhüm mine’l-hâzırîn.