Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 123 Hüküm no: 82 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah’ın arsasını Yanaki adlı zimmiye sattığı Mahmiye-i İstanbul hısnı ebvâbından Topkapısı dâhilinde Kürkçübaşı Mahallesi’nde sâkine Emine Hatun bt. Abdullah tarafından husûs-ı âti’l-beyâna vekîl olduğu mezbûre Emine Hatun’un zâtı[nı] ma‘rifet-i şer‘iye ile ârifân İmâm Mustafa Efendi b. Şa‘ban ve Mehmed b. Mustafa nâm kimesneler şehâdetleri ile şer‘an sâbit olan Yusuf Ağa b. Osman nâm kimesne meclis-i şer‘-i hatîr-i lâzımü’t-tevkīrde işbu bâ‘isü’s-sifr Yanaki v. Velisar[i] nâm zimmî muvâcehesinde bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Emine’nin yedinde mülk ve hakkı olup kezâlik mahmiye-i mezbûre hısnı ebvâbından Fener kapısı hâricinde Abdi Subaşı Mahallesi’nde sâhil-i bahrde vâki‘ bir tarafdan el-Hâc Davud vakfı ve bir tarafdan Yanaki Keşiş mülkü ve bir tarafdan sâhil-i bahr ve bir tarafdan tarîk-ı âm ile mahdûd olup fevkānî ve tahtânî büyût-ı adîdeyi ve bir su kuyusunu müştemil olan mülk menzilinin ebniyesi işbu târih-i kitâb senesinde vâki‘ harîkde bi’l-külliye muhterik olup arsa-i sırfa kalmağla arsa-i mezbûreyi mezbûr Yanaki’ye tarafeynden îcâb ve kabûlü hâvî şurût-ı müfsideden ârî bey‘-ı kat‘î ile altı yüz yetmiş esedî guruşa müvekkile-i mezbûreye [mezbûre] bi-zâtihâ bey‘ ve teslîm ol dahi ber-vech-i muharrer arsa-i mezbûreyi iştirâ ve tesellüm eylediğinden sonra semeni olan meblağ-ı mezbûr altı yüz yetmiş guruşu müvekkile-i mezbûre ahz ü kabz eyleyip min-ba‘d arsa-i mezbûrede alâka ve medhalim kalmayıp mezbûr Yanaki’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Hüseyin Ağa b. Mustafa, Ali Ağa b. Mustafa, Ahmed Bey el-Cündî, Mehmed b. Mehmed, Mustafa b. Mehmed, Ali b. İbrahim.