Bab Mahkemesi 54 Numaralı Sicil (H. 1102 / M. 1691) cilt: 20, sayfa: 338 Hüküm no: 405 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Abdullah’ın, Ayşe bt. Mustafa’ya hibe ettiği bağ ve menzilin iadesi Mahmiye-i İstanbul’da Süleymaniye mahallesinde sâkine Ayşe bt. Mustafa nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, mahrûse-i Galata’da Kulekapısı kurbunda sâkine işbu hâzıra bi’l-meclis Gevher Hâtun bt. Fethullah Bey’in mu‘takası olan Râbia bt. Abdullah mahzarında ikrâr ve takrîr-i kelâm edip, târih-i kitâb senesi Muharremi evâhirinde mezbûre Râbia Gemlik kazâsına tâbi‘ Armudlu nâm karyede vâki‘ bir tarafdan Kömürcü oğlu ve bir tarafdan Bostancı Emir mülkleri ve bir tarafdan çeşme ve bir [tarafdan] tarîk-i âm ile mahdûd mülk menzilini, Gökyurd nâm mahalde vâki‘ etrâfı el-Hâc Ali ve Kayış oğlu ve Baş Usta ve Dükkâncı Mehmed mülkleri ile mahdûd mülk bağını, safka-i vâhide ile bana hibe ve teslîm, ben dahi ittihâb ve kabz edip, hâlâ mevâni‘-i rücû‘u bulunmamakla, mezbûre Râbia hibe-i mezbûreden rücû‘ edip, zikr olunan menzil ve bağı benden taleb ve da‘vâ etmekle, ben dahi onlardan kasr-ı yed edip, kel evvel mahallinde zabt ve tasarrufa mezbûre Râbia’yı taslît eyledim. Min ba‘d mârru’z-zikr menzil ve bağda alâka ve medhalim kalmayıp ve husûs-ı mezbûre müte‘allika da‘vâ ve nizâ‘ım yokdur dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire sene 1102. Şuhûdü’l-hâl: Yusuf Beşe b. Abdi, İmâm Mustafa Efendi b. İbrahim, el-Hâc Cafer b. Abdi, Hüseyin Efendi b. ( ) hâce, Ali Efendi el-kayyum, Ali Çelebi b. ( ) kapudan.