Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 185 Hüküm no: 123 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden eşi Kasım Çelebi’nin varislerinin birbirlerinin zimmetlerini ibra ettikleri Mahmiye-i İstanbul’da Edirnekapısı dâhilinde Keçeci Pîrî mahâllesinde sâkin iken bundan akdem vefât eden Kasım Çelebi b. Mustafa nâm kimesne verâseti zevce-i metrûkesi Saliha bt. Ali nâm hatun ile sulbî kebîr oğulları İbrahim ve Mustafa Çelebilere ve sulbiye sagīre kızları Emetullah ve Hadîce’ye münhasıra ba‘dehû sagīretân-ı mezbûretân Emetullah ve Hadîce dahi müte‘âkiben fevt olmalarıyla verâsetleri vâlideleri mezbûre Saliha ile er karındaşları mezbûretân İbrahim ve Mustafa Çelebilere münhasıra olduğu şer‘an zâhir ve müte‘ayyin oldukdan sonra zâtı Ahmed Ağa b. İsmail ve Mustafa Çelebi b. Ahmed nâm kimesneler ta‘rîfleriyle mu‘arrefe olan mezbûre Saliha Hatun mahmiye-i mezbûrede meclis-i şer‘-i hatîrde işbu bâ‘isü’l-vesîka mezbûrân İbrahim ve Mustafa Çelebiler mahzarında ikrâr ve takrîr-i kelâm edip zevcim müteveffâ-yı mezbûrun terekesi ekall-i kalîl olup deynine vefâ etmemekle mezbûrân İbrahim ve Mustafa Çelebiler babaları zevcim müteveffâ-yı mezbûr Kasım Çelebi zimmetinde mütekarrer ve ma‘kūdün-aleyh olan altı bin akçe mehr-i müeccelimin iki bin akçesini mezbûrân İbrahim ve Mustafa Çelebi müteveffâ-yı mezbûrun terekesinden bana def‘ ü teslîm ben dahi yedlerinden ahz u kabz edip mehr-i müeccelimden bâkī kalan dört bin akçeye ve zevcim müteveffâ-yı mezbûrun sâir terekesine ve ba‘dehû müte‘âkibeten vefât eden mezbûretân Hadîce ve Emetullah’ın kalîl u kesîr terekesine müte‘allıka da‘vâdan mezbûrân İbrahim ve Mustafa Çelebi’nin zimmetlerini ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Saferi’l-hayr sene 1116. Şuhûdü’l-hâl: Emin Mehmed b. Ahmed?, Ömer Efendi el-kâtib, Veliyüddin Efendi el-kādı, el-Hâc Yusuf, Mustafa b. Ali.