Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 364 Hüküm no: 349 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın alacak davasında sulh olması Vilâyet-i Rumeli’nde medîne-i Yenişehir-i Fener kazâsında Hasanbaba nâm karye ahâlîsinden Mehmed Ağa b. Yakub nâm kimesne mahmiye-i İstanbul’da meclis-i şer‘-i hatîrde bâ‘isü’l-kitâb diğer Mehmed Ağa b. Ahmed nâm kimesne mahzarında ikrâr ve takrîr-i kelâm edip ben bundan akdem Eğriboz Muhâfızı Ali Paşa’nın Karlıili sancağında mütesellimi olup vardıkda henüz zabt etmeksizin mezbûr diğer Mehmed Ağa üzerime gelüp beni ahz ve malımdan nakd üç bin yedi yüz elli guruş ile altı re’s bargir ve bir sîm kemer raht ve ber-mûceb-i defter eşyâ-yı ma‘lûmemi bi-gayrı hakkın ahz u kabz etmekle husûs-ı mezbûru bundan akdem mezbûr diğer Mehmed Ağa’dan taleb ve da‘vâ eylediğimde ol dahi bi’l-külliye inkâr edip bu vech üzere beynimizde münâza‘ât-ı kesîre vâki‘ olmuş idi. El-hâletü hâzihi vesâtet-i muslihîn ile an-inkâr merkūm diğer Mehmed Ağa benimle da‘vâ-i mezkûremden iki yüz guruşa sulh oldukda ben dahi sulh-ı mezbûru ba‘de’l-kabûl bedel-i sulh olan meblağ-ı merkūm iki yüz guruşu mezbûr diğer Mehmed Ağa yedinden tamâmen ahz u kabz edip bâlâda zikr olunan husûslara müte‘allıka da‘vâdan mezbûr diğer Mehmed Ağa’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdi aşer min-Cumâdelûlâ li-sene sitte aşere ve mi’e ba‘de’l-elf. Şuhûdü’l-hâl: Hüseyin Efendi kâtib, İbrahim Ağa cebeci, Mustafa Efendi kâtib-i cebeciyân, Mehmed Çelebi b. ( ), Hüseyin Kethüda an-İnebahtı, el-Hâc İbrahim an-İnebahtı, Ahmed Ağa nâzır-ı Filibe, Osman Çelebi an-Haleb, el-Hâc Mehmed Çavuş mübâşir.