Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 66 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Barta bt. Paliç’in evine dönerek eşine itaat etmesi Ma‘rûz Bâ‘isü’l-i‘lâm Karabet zimmî mahfil-i şer‘iyyâtda şahsı ta‘rîf-i şer‘î ile mu‘arrefe olan zevcesi Barta bt. Paliç Nasrâniye muvâcehesinde mezbûr Barta bundan akdem beş bin akçe mehr-i müeccel ve iki bin dört yüz akçe mehr-i mu‘accel ile tezevvüc [ve] mehr-i mu‘accelini dahi istîfâ edip iki aydan beri bir menzilde sâkinler olup el-ân zevcem iken yirmi günden beri babası mezbûr Peliç zimmînin menziline firâr edip müstakıllen tedârik eylediğim menzile gelip benimle zevciyyet mu‘amelesinden imtinâ‘ eder deyü teşekkî etdikde, mezbûr Barta Nasrâniye dahi cevâbında, hâl minvâl-i muharrer üzere sâkin olduğunu ikrâr ü i‘tirâf edip lâkin zevcem mezbûr Karabet anası ile bir yerde olduğundan mâ‘adâ meûnet ve libâsımı görmeyip ben seni satın aldım deyü beni rencîde eder deyü teşekkî eyledikde ba‘de’l-yevm zevcesi mezbûrenin nafaka ve kisvesini görüp hilâf-ı şer‘ bir tarîkle rencîde etmemek üzere zevc-i mezbûra tenbîh olundukdan sonra zevc-i mezbûrun ber-vech-i muharrer müstakıllen tedârik eylediği menzilinde sâkine olup zevciyyet mu‘âmelesinden ibâ vü imtinâ‘ etmemek üzere zevcesi mezbûre Barta Nasrâniyeye tenbîh olunduğu mübâşirleri ilkāsıyla huzûr-ı âlîlerine i‘lâm olundu. Fî 24 Cemâziyelâhire sene [11]71. Şuhûdü’l-hâl: ( )