Tophane Mahkemesi 2 Numaralı Sicil (H. 966-967 / M. 1558-1559) cilt: 43, sayfa: 130 Hüküm no: 292 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin, Memi b. Abdullah’a ve şeriata küfrettiği Vech-i tahrîr-i sicil budur ki Memi b. Abdullah nâm kimesne Yorgi nâm zimmîyi meclis-i şer‘a ihzâr ve üzerine takrîr-i da‘vâ edip mezkûr benim dükkânım önüne gelip bevl etmek kasdın ettikde dükkânım önüne bevl etmesini şerî‘ata ilettürürüm dedikde şerî‘atı da sikim sizi de sikim deyü şetm eyledi hâliyâ mûcibin taleb ederim dedikde mezkûra suâl olundukda inkâr ile cevâb vericek müdde‘î-i mezbûr Memi’nin da‘vâsına muvâfık beyyine taleb olundukda udûl-ı Müslimînden Ahmed b. Abdullah ve Mehmed b. Mahmud ve Seyfi b. Hızır ve Muharrem b. Abdullah nâm kimesneler meclis-i şer‘a hâzirûn olup biz şâhidleriz şehâdet dahî ederiz kim müdde‘î-i mezbûr sizi şerî‘ata ilettürürüm dedikde mezkûr Yorgi sizi de sikim şerî‘ati de sikim deyü şetm eyledi deyü şehâdet eylediklerinde şehâdetleri ba‘de’t-tezkiye hayyiz-i kabûlde vâki‘ olup bi’t-taleb kaydolundu. Şuhûdü’l-hâl: Hasan Ağa Reisü’l-muhzırîn, Seyyid Mehmed b. Seyyid İmâd, Cafer b. Ramazan, Ahmed b. Dede, Ahmed Reis b. Abdullah ve Kadir b. Abdullah