Tophane Mahkemesi 2 Numaralı Sicil (H. 966-967 / M. 1558-1559) cilt: 43, sayfa: 143 Hüküm no: 350 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma, Ahmed, Kurd ve diğer Kurd adlı çingenelerin Ahmed b. Kasım’n parasını çaldıkları Ahmed b. Kasım nâm imâm Fâtıma bt. Abdullah, Ahmed b. Mustafa ve Kurd b. İskender ve diğer Kurd b. Abdül nâm Çingâneleri meclis-i şer‘a ihzâr ve mahzarlarında takrîr-i da‘vâ edip işbu cebimde göklü, aklı, alaca kese içinde bir mikdâr on yedi akçem aldılar hakkım taleb ederin dedikde beyyine taleb olundukda udûl-ı Müslimînden ve sâdât ve seyyidînden Hacı Maksud b. Musa ve Hacı Mehmed b. Ali ve Mehmed b. el-Hâc Hasan nâm kimesneler li-ecli’ş-şehâde mahfil-i şer‘a hâzirûn olup mezbûr muvâcehesinde edâ-yı şehâdet edip mezbûrûn Çingâneler bilede peremeye girerken mezkûr müdde‘î yanına varıp hâil olup mezkûre Kıbtiye elin mezkûr imâmın hil‘atın sıkıp zikr olan kese ile akçesin aldı deyü şehâdet eyledikde mâ vaka‘a bi’t-taleb kaydolundu. Şuhûdü’l-hâl: Derviş Çelebi b. Mustafa ve Yahşi b. Safer ve Mustafa b. Abdullah