Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 210 Hüküm no: 296 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Hacı’nın satın aldığı Rus asıllı kölenin Eyne Hacı b. Sultan Şah’a ait olduğu. Fî kazâ-i Gerede fî vilâyet-i Hisarözü fî karye-i Yayabaşlar Sebeb-i tahrîr-i kitâb ve mûcib-i tastîr-i hitâb budur ki Eyne Hacı b. Sultan Şah meclis-i şer‘a sallallâhu alâ şâri‘ihî Süleyman b. Hacı ile el’ân Konrapa kadısı Deniz Çelebi b. Ali’den satın aldığı orta boylu açık kaşlı ela gözlü sarışın kösecü’ş-şekl Rûsiyyü’l-asl Hasan nâm abdi ihzâr ettikde da‘vâ kılıp dedi kim işbu abd benim mülküm iken ibâkât edip gitmişdir el-hâletü hâzihî sende buldum el’ân mülkümdür deyicek mezkûr Süleyman inkâr ile cevâb verip senin idiği bilmezim dedikde mezbûr müdde‘î Eyne Hacı’dan alâ sıdkı da‘vâhu beyyine taleb olundukda udûl-i müslimînden İsa b. Memi ve Dahî b. Hızır ve Ebu’l-leys b. Nâzır şehâdet-i sahîha-i şer‘iyye eylediler ba‘de’t-tezkiyeti’ş-şer‘iyye ve’t-tahlîf şehâdetleri kabûl olundukdan sonra mezkûr-ı mevsûf abd mezbûr Eyne Hacı’ya hükm olundu. Tahrîren fî evâili Şevvali’l-mu‘azzam sene 921. Şuhûdü’l-mazmûn Hacı Ali b. Mustafa, Demirhan b. İsmail ve Musa Fakih b. Kudbeddin ve Şah Bâli b. Ali Fakih