Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 223 Hüküm no: 333 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Üveys’in Mehmed b. Salih hakkında açtığı mihir davası. Sebeb-i tahrîr-i kitâb-ı şer‘î ve mûcib-i tasdîr-i hitâb-ı mer‘î budur ki Aziz b. Ömer meclis-i şer‘a sallallâhu alâ şâri‘ihî ba‘de sübûti vekâletihî an kıbel-i Emine bt. Üveys bimâ-hüve tarîki’s-sübût minhü şer‘an Mehmed b. Salih’i ihzâr edip şöyle takrîr-i da‘vâ edip dedi kim beni vekîl nasb eden Emine bt. Üveys’in sende mihr-i müecceli dört bin akçesi var imiş taleb ederim dedikde mezkûr Mehmed cevâbında da‘vâ edip dedi kim mezbûre Emine geldiği gece mestûr mihr-i müeccelini iki yüz akçeden gayrısını bana bağışladı deyicek mesfûr vekîl inkâr ettikde udûl-i müslimînden Yusuf b. Abdullah ve Hasan b. Abdullah el-muzzân mezbûr Mehmed’in kelâmına mutâbık şehâdet-i sahîha-i şer‘iyye eylediler ba‘de’t-tezkiyeti’ş-şer‘iyye ve’t-tahlîfi’l-âdî şehâdetleri kabûl olundukdan sonra mestûr Mehmed’in berâ’etine hükm olunup deftere sebt olundu. Tahrîren fî evâsıtı Saferi’l-muzaffer sene 922. Şuhûdü’l-mazmûn Mehmed b. (…) Davud Reis b. Bıçakcı ve Abdi Reis b. Yahya ve Ali b. Abdullah ve Ali b. İsmail ve Kara Ali ve Ramazan b. Yunus ve Kilerci Kasım b. Abdullah ve Mehmed b. İsa ve emîn Sinan Bey b. Abdullah ve Şah Bâli b. Ali Fakih ve gayruhum mine’l-hâzırîn