Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 225 Hüküm no: 338 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar’da yakalanan Rum asıllı kaçak kölenin müddet-i örfiyyesi tamam olup satıldıktan sonra sahibinin bulunup teslim edildiği. Sebeb-i tahrîr-i kitâb budur ki Ahır halkından Alagöz nâm seyis bir kısa boylu açık kaşlı yüzü benli kara gözlü buğday enli başına külâh ve eğnine yeşil aba giyer Rûmiyyü’l-asl abd-i âbıkı sene isnâ ve işrîn ve tis‘a mi’e Rebi‘ulevveli’nin yirmi dördüncü gününde tutup yevm[î] nafakası ve hıfzı için ikişer akçe takdîr olunup Üsküdar’ı mukāta‘aya tutan âmil Mehmed b. Bekir’e bi’l-vâsıta teslîm olunup deftere sebt olundu. Tahrîren fî âhir-i Rebi‘ulevvel sene 922. Mezkûr-ı mevsûf abd-i âbıkın müddet-i örfiyye[si] tamâm oldukda mirâren mezâd olunup bahâsı dokuz yüz akçede tekarrür buldukdan sonra satıldıkda deftere sebt olundu. Tahrîren fî evâili Recebi’l-mürecceb sene 922. Mezkûr-ı mevsûf satılan kul İstanbul’da Koca Davud Paşa mahallesinde diğer Yunus’un idiğine zi’l-yed olan Yusuf b. Kerameddin muvâcehesinde Elhâc Ferhad b. Abdullah ve Yusuf b. Abdullah şehâdet-i sahîha-i şer‘iyye eylediler öyle olsa mezkûr-ı mevsûf kul mezbûr Yunus’a hükm olundu. Şuhûdü’l-mazmûn Hüseyin b. Kılağuz ve Ramazan b. Ahmed ve İlyas b. Abdullah ve Mustafa b. Abdullah