Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 311 Hüküm no: 519 Orijinal metin no: [85b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dragut’un Mehmed b. İsa’dan aldığı bostanı Makrayani adına aldığı. Sebeb-i tahrîr-i kitâb budur ki Makrayani? nâm kâfir meclis-i şer‘de hıyarlı bostanını Mehmed b. İsa’ya sâbıkan üç bin akçeye satdıkdan sonra mezkûr Mehmed dahi Dragut? nâm kâfire üç bin iki yüz altmış akçeye meclis-i şer‘de satdım dedi mezbûr Dragut dahi ikrâr-ı sahîh ile ikrâr ettikde meblağ-ı mestûr Dragut’dan Mehmed’e hükm olundukdan sonra mezkûr Dragut mezbûr Makrayani’[yi]? meclis-i şer‘a ihzâr edip dedi kim sen bana mesfûr-ı mevsûf bostanı bana vermezler benim için alıver dedin ben senin için alıverdim ben içine de girmedim dedikde mezkûr Makrayani? inkâr ettikde mezbûr Dragut’un kelâmına mutâbık Ayas b. Abdullah ve Mustafa b. Davud şehâdet-i sahîha-i şer‘iyye eyleyip dediler kim biz şâhidleriz şehâdet ederiz kim sen sâbıkā Mehmed’e satdığın hıyarlı bostanı benim için alıver dedin dediler ba‘de’t-tezkiye şehâdetleri kabûl olundukda mezkûr Dragut mezbûr-ı mevsûf bostanı mukırr Yani için alıverdiği sâbit oldukdan sonra Dragut’ın talebiyle deftere sebt olundu. Tahrîren fî evâsıtı Muharrem sene 924. Şuhûdü’l-mazmûn Pîr Mehmed b. Mevlânâ Sinan ve Ahmed b. Hoşkadem ve Şah Bâli b. Ali Fakih ve Yorgi ve Andreya ebnâ-i Demir Mihal ve Andreya levend ve gayruhum mine’l-hâzırîn