Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 320 Hüküm no: 545 Orijinal metin no: [89a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Abdurrahman’ın kiraya verdiğini söylediği katırın, kiraya verilmeyip Veli tarafından Nazar b. Ali’ye satıldığına dair. Sebeb-i tahrîr-i kitâb budur ki Veli b. Abdurrahman Katırcı meclis-i şer‘a Nazar b. Ali’yi ihzâr ettikde şöyle takrîr-i da‘vâ edip dedi kim sen benim katırımı emânet Haleb’e aldın gitdin kirasını senden taleb ederim dedikde mezkûr Nazar inkâr ile cevâb verip dedi kim sen bana katırı altı yüz yirmi akçeye satdın sâbıkā katırı aldığın Ali b. Musa[,ya] mezbûr katır bahâsından olan altı yüz akçeye bende olan altı yüz yirmi akçenin altı yüz akçesini havâle ettin ben de dahi altı yüz akçeyi mezbûr Ali’ye verdim deyicek mestûr Veli inkâr ettikde mezbûr Nazar’ın lafzen ve ma‘nen da‘vâsına mutâbık beyyine taleb olundukda Şaban b. Mahmud ve Mahmud b. Ali şehâdet-i sahîha-i şer‘iyye eylediler öyle olsa mezkûr Veli mezbûr katırı mestûr Nazar satın aldığı sâbit olup deftere sebt olundu. Tahrîren fî evâsıtı Cemâziyelâhir sene 924. Şuhûdü’l-mazmûn İbrahim b. İshak ve Ahmed b. Safer ve Pîr Mehmed b. Mevlânâ Sinan ve Ali b. Hüseyin ve Çalabverdi b. İlyas ve gayruhum