Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 348 Hüküm no: 623 Orijinal metin no: [97b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elhâc Sinan b. Gerson’un Çengelköy’de Fazlullah imâreti vakfından kiraladığı yere Mihal b. Dimitri’nin müdahalesinin men’ine ve yaptırdığı duvarın yıkılmasına dair. Fasl Vech-i tezkiretü’l-hurûf oldur ki Elhâc Sinan b. Gerson? el-yahudî et-tabîb meclis-i şer‘a ez-zimmî Mihal b. Dimitri’[yi] ihzâr edip takrîr-i da‘vâ edip dedi kim karye-i Çengel’de Fazlullah imâreti evkāfından bir kıt‘a yer ki tahdîdden müstağnidir li-şehr lehâ ınde cîrânihâ zikr olan yeri mütevellî-i vakf olan Seferşah b. ( ) vakf için elli akçem alıp bana tapuya vermişdir takrîben on üç yıl vardır ki benim tapulu yerimdir dedikde gıbbe’l-inkâr mezkûr Mihal zikr olan yeri mezkûr Seferşah’dan sonra mütevellî olan Pîrî Çelebi’den takrîben beş yıl vardır ki tapuladım deyicek mezkûr Elhâc Sinan mahrûse-i Kostantiniyye’de nâ’ibü’ş-şer‘ olan Mevlânâ Salih b. Mustafa ünvân-ı bâ-mu‘anven kitâb-ı nakli? irâd edip zeyl-i kitâbda mestûr olan şuhûd-ı tarîk ki Şemseddin b. Ömer ve İsmail b. Mehmed’dir alâ vechi’l-hasm şehâdet edip mazmûn-ı nakilde Musa Çelebi b. Ömer el-emîn fî kapani’s-semek bi-medineti Kostantiniyye ve Mevlânâ Pîrî b. Ali et-tabîb fî darişşifâi bi’l-medineti’l-mezbûre li’n-nakl ve’t-tahvîl mezkûr Elhâc Sinan’ın min-cemî‘i’l-vücûh da‘vâsına muvâfık edâ-i şehâdet-i şer‘iyye edip gıbbe’t-tezkiyeti’ş-şer‘iyye ve’t-ta‘dîl şehâdetleri huzûr-ı şerîflerinde hayyiz-i kabûlde vâki oldukdan sonra hufyeten hâli inhâ etmişler mezkûr Mihal’in üzerine tafsîl üzere okunup şuhûdu’t-tarîk alâ vech-i tamâm şehâdet ettiklerinden sonra mezkûr Mihal mûmâ-ileyh hasmıyla şâhidân-ı mezbûrân mezkûr Mihal’in yüzüne şehâdet etmek için huzûr-ı şerîflerine beraber irsâl olundukdan sonra üç günden sonra varmadığın i‘lâm etmişler yine fakîre mürâfa‘a ediniz bundan evvel kadı nâ’ibi olan Mevlânâ Yusuf b. Evhad dahi arz-ı mezbûreyi mezkûr Elhâc Sinan’a hükm edip ve mezkûr Mihal’in üzerinde bina ettiği duvarları mûmâ-ileyh Elhâc Sinan talebiyle kal‘ etmeğe hükm ettiğine mûmâ-ileyh Mihal ikrâr edip ve hem mezkûr Elhâc Sinan dergâh-ı felek-iştibâhdan zikr olan duvarların kal‘ına hükm-i şerîf dahi irâd edip ve fahrü’l-ulemâi’l-mütebahhirîn Müftî Ali Çelebi b. Cemaleddin Efendi’nin sûret-i mezkûrede kal‘-ı bina etmek fetvâsın dahi ibrâz edip ber-mûceb-i şer‘-i şerîf ve hükm-i münîf zikr olan yer mezkûr Elhâc Sinan’a hükm olunup ve mezkûr Mihal’in üzerinde binâ ettiği duvarlar kal‘ına sâbıkā olan hükm-i şer‘î imzâ ve mukarrer kılındıkdan sonra sebt-i sicil olundu. Tahrîren fî’l-yevmi’r-râbi‘ fî şehr-i Recebi’l-mürecceb sene 925 Şuhûd Bekir b. Mustafa ve Musa b. Kudbeddin İsa b. İsmail Fakih ve Merdeha b. Yakub ve gayruhum