Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 352 Hüküm no: 632 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hediye bt. Süleyman ile Şahide bt. Mustafa arasındaki veraset davası. Sebeb-i tahrîr-i sicil oldur ki Seydî b. Durmuş meclis-i şer‘a gelip zevcesi Hediye bt. Süleyman tarafından vekâlet-i mutlakasın bimâ-hüve tarîki’l-beyân şer‘an ve isbât ettikden sonra merhûm müteveffâ Rüstem’in eytâmına kıbel-i şer‘den vasiyye nasb olunan zevcesi Şahide bt. Mustafa’yı ihzâr edip bundan akdem müvekkiletemin oğlu Seydî b. Musa ki benim üveyi oğlumdur Kösec Bâli nâm kimesne sekiz yıl mikdârı hidmet eyledikden sonra mezkûr Kösec Bâli fevt olup muhallefâtı senin zevcene zevcinden eytâmına ve sana intikāl edip mezkûr Seydî’nin sekiz yıl hizmetinden hakkı müteveffâ Kösec Bâli zimmetinde kaldı taleb ederim dedikde mezkûre Şâhide tav‘an ikrâr edip mesfûr Kösec Bâli senin ücret-i hidmetinden hakkın taleb ettiğin Seydî’ye akçe vermezdi hemen eğnine ve başına ve ma‘aşına sarf edip kullanırdı dedikden sonra sekiz yıl mikdârı kullandığına dahi i‘tirâf edicek ehl-i vukūf olan müslümanlardan dahi teftîş olıcak vâkıa mezkûr Seydî zikr olan Kösec Bâli’ye sekiz yıl mikdârı hidmet eyledi ve ol asıl hizmetleri şimdi yılda yüzer akçeye ekall kabûl dahi ederler mezbûr Seydî’nin bu mikdâr hakkı zikr olan Kösec Bâli üzerinde kalmışdır deyu Mustafa Çelebi b. Seralu? ve Ali b. İlyas şehâdet dahi ettiklerinde mezkûr Kösec Bâli’nin zikr olan Seydî ‘ye ücret-i hidmetinden sekiz yüz akçe ecr-i misil cihetinden deyn zâhir olıcak mezkûr Rüstem muhallefâtından hükm olundu. Fî evâhiri Receb sene 925 Şuhûdü’l-hâl Uğurlu b. Yusuf, Ali b. Hızır, Hamza b. Sarı, Dündar b. Hacı Bey, Osman b. Gevherdaş, Demirhan b. İsmail, Mustafa b. Abdullah, Şaban b. İlyas