Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 380 Hüküm no: 691 Orijinal metin no: [104b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şile’de akarsuda altına benzer bir madde bulan Sadık b. İdris, İlyas Fakih ve İdris’in durumlarının araştırıldığı. Fasl Vech-i tezkiretü’l-hurûf oldur ki kazâ-i Şile’den Sadık b. İdris ve İlyas Fakih ve İdris bundan akdem su akıntısında altına şebîh bir nesne bulup altın sanıp satmak niyyetine nice kimesnelere ve sarrâflara gösterip kimesne almayacak halk arasında şöhret bulup ve bi’l-cümle mezkûrlara defîne bulmak töhmeti isnâd olundukdan sonra hâliyâ mübâşir-i beytülmâl olan bende Şamlı Rüstem Bey mezbûrân Sadık ve İdris’i meclis-i şer‘a ihzâr edip kemâl-i dikkat ve nihâyet-i ihtimâm üzere teftîş ve tefahhus olundukda mezkûrâna bu töhmet isnâd olunalıdan beri müddet-i medîde olup bunlarda alâmet-i defîne ve âyine-i gınâ zâhir olmayıp ve bulduğu nesne aynıyle meclis-i şer‘de ihzâr olunup müslümanlardan cemm-i gafîr altın değildir dediklerinden sonra mezbûrân Sadık ve İdris’e örf-i ma‘rûf üzere talâk-ı selâseye and verip ve yemîn billâh dahi ettiklerinden sonra berâ’etlerine ve nefislerine kazâ-i mezbûrdan Sarıdoğan nâm mevzi‘den Hacı b. Musa kefîl olup tezkire-i mâ-cerâ için sebt-i sicil olundu. Tahrîren fî 26 Saferi’l-muzaffer sene 926. Şuhûd Musa Dede b. Turud ve Bekir Fakih b. Mustafa ve Yusuf b. Abdullah ve Mehmed b. Dânişmend ve gayruhum