Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 80 Hüküm no: 38 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çengelköy vergisinin Andreyoz b. Matyoz’a mukataaya verildiği Kazıyye Nefs-i Gekvize’de merhûm Hoca Fazlullah imâretinin evkāfına el-ân câbi olan Üveys b. Ahmed meclis-i şer‘a gelip zikr olan imâretin evkāfına müte‘allik Çengelköyü nâm karyenin cümle mahsûlünü işbu mûmâ-ileyh Andreyoz b. Matyoz nâm zimmîye târih-i defterden üç yılı kırk beş bin akçeye mukāta‘aya verdim ki ba‘de’l-yevm mezkûr Andreyoz zikr olan karye mahsûlünü kadîmden olageldiği üzere üç yılın (…) hâsılıyla zabt edip üç ayda bir yevmü’l-kısta cevâb vere deyu ikrârını mezkûr Andreyoz tasdîk edicek kazıyye sicillâta kayd olundu. Cerâ zâlike ve hurrire fî gurre-i Rebî‘ilevvel sene 925. Derkenar: Yer tapusunu ve cürm-i cinâyetini ve beytülmâlini ve resm-i arûsunu ve resm-i ganemini ve yemiş ve kovan ve bâ‘d-i hevâsını ve ispençesini ve haracını mutasarıf ola. Şuhûdü’l-hâl: Mevlânâ Bekir b. Mustafa, Mehmed Çelebi b. Hamza, Rıdvan b. Durak, Timurhan b. İsmail ve gayruhum Derkenar: Ba‘dehû mezkûr Andreyoz zikr olan karye mahsûlünü kendi cânibinden görülüversin dâ’im bunlara müte‘allik olan kazâyâları görüvermek için Timurhan b. İsmail’i vekîl edip mezkûr Timurhan dahi vekâlet-i mezbûreyi meclis-i tevkîlde kabûl edicek sebt-i defter olundu. Bi-mahzari’l-mezkûrîn.